AQSH, Rossiya va Ukraina delegatsiyasi Ar-Riyodda (Saudiya Arabistonida) olib borgan muzokaralarda nimalarga kelishib olgani ma’lum bo‘ldi. Oq uy muzokaralar yakunlari bo‘yicha bayonot berdi.
Nimalarga kelishildi?
- AQSH va Rossiya Qora dengizda xavfsiz kema qatnovini ta’minlash va kuch ishlatishni istisno qilishga kelishib oldi. Bu borada amerikaliklar Ukraina bilan ham kelishuvga erishgan. Bundan tashqari, AQSH va Ukraina Qora dengizda tijorat kemalaridan harbiy maqsadlarda foydalanishni oldini olishga rozi bo‘lgan.
- AQSH Rossiyaning qishloq xo‘jaligi mahsulotlari va o‘g‘itlar eksporti uchun jahon bozoriga kirishini tiklashga yordam beradi;
- AQSH Rossiya va Ukraina energetika obyektlariga zarbalarning oldini olish choralarini ishlab chiqmoqda (Rossiya ham, Ukraina ham bunga rozi bo‘lgan);
- AQSH harbiy asirlar almashinuvi, qo‘lga olingan fuqarolarni ozod qilish va majburiy ko‘chirilgan ukrainalik bolalarni qaytarishga ko‘maklashish niyatida;
- AQSH va Ukraina energetika hamda dengiz kelishuvlarini amalga oshirish uchun uchinchi davlatlarning vositachiligini olqishlaydi; AQSH bu borada Rossiya bilan ham kelishuvga erishgan.
Amerika Ar-Riyodda erishilgan kelishuvlarga muvofiq tinchlikka erishish uchun tomonlar o‘rtasidagi muzokaralarda yordam berishda davom etadi. Oq uydan so‘ng muzokaralar yakunlari bo‘yicha Kreml ham bayonot berdi. Rossiya amerikaliklar e’lon qilgan barcha bandlarni tasdiqlagan.
Biroq Kreml bayonotida ta’kidlanishicha, kemalar qatnovi xavfsizligi to‘g‘risidagi band ayrim cheklovlar olib tashlanganidan keyingina kuchga kiradi. Cheklovlarga quyidagilar kiradi:
- oziq-ovqat mahsulotlari (shu jumladan baliq mahsulotlari) va o‘g‘itlarning xalqaro savdosi bo‘yicha operatsiyalarni ta’minlaydigan “Rosselxozbank” va boshqa moliya tashkilotlaridan sanksiyalarni olib tashlash, ularni SWIFTga ulash, zarur vakillik hisobvaraqlarini ochish;
- oziq-ovqat mahsulotlari va o‘g‘itlar ishlab chiqaruvchi hamda eksport qiluvchi kompaniyalardan sanksiyalarni olib tashlash;
- oziq-ovqat va o‘g‘itlar savdosiga jalb qilingan Rossiya bayrog‘i ostidagi kemalarga portlarda xizmat ko‘rsatishga cheklovlar va sanksiyalarni bekor qilish;
- Rossiyaga qishloq xo‘jaligi texnikasi, shuningdek, oziq-ovqat va o‘g‘itlar ishlab chiqarishga jalb qilingan boshqa tovarlarni yetkazib berishga cheklovlarni olib tashlash.
- Rossiya tomonlardan biri rioya qilmagan taqdirda kelishuvlardan chiqishi mumkin.
Rossiya va Ukraina energetika obyektlariga zarba berishni taqiqlash 18-martdan boshlab 30 kunga amal qiladi, tomonlar bu muddatni uzaytirishi mumkin.
Ukraina mudofaa vaziri Rustem Umerov Oq uy tomonidan e’lon qilingan kelishuvlarning barcha bandlarini tasdiqlagan. Prezident Vladimir Zelenskiy Kremlning Saudiya Arabistonidagi muzokaralar yakunlari bo‘yicha bayonoti e’lon qilinganidan keyin Rossiyani manipulyatsiyada ayblagan.
Ular kelishuvlarni buzib ko‘rsatishga va aslida bizning vositachilarimizni ham, butun dunyoni ham aldashga urinmoqda. Oq uy tomonidan e’lon qilingan mutlaq aniq bayonotlar bor. U yerda nima deyilganini hamma ko‘rishi mumkin.
Kreml yana bir narsada yolg‘on gapirayotgani haqida ham gapirmoqchiman. Go‘yoki Qora dengizdagi tinchlik sanksiyalarning bekor qilinishiga bog‘liq emish, go‘yoki energetika sohasidagi tinchlikning boshlanish sanasi 18-mart emish, dedi Zelenskiy.
Izoh (0)