Amerikaning United Airlines aviakompaniyasining Los Anjelesdan Shanxayga uchayotgan samolyoti uchuvchilardan biri pasportini unutib qoldirgani sababli orqaga qaytishiga to‘g‘ri keldi. Bu haqda kompaniya matbuot xizmatiga tayanib, CNN xabar berdi.
Ma’lum qilinishicha, samolyot bortida 257 nafar yo‘lovchi va 13 nafar ekipaj a’zosi bo‘lgan. Uchoq mahalliy vaqt bilan soat 14:00 da havoga ko‘tarilgan. Samolyot ikki soatlik parvozdan so‘ng ortga qaytib, San Fransiskoga yo‘l olgan va soat 17:00 atrofida qo‘ngan.
Uchuvchining yonida pasporti yo‘q edi. Mijozlarimizni o‘sha kuni kechqurun manzilga yetkazish uchun yangi ekipaj tashkil qildik. Ularga ovqatlanish va kompensatsiya uchun vaucherlar taqdim etildi, deyiladi aviakompaniya bayonotida.
To‘rt soatdan keyin San Fransiskodan Shanxayga yangi ekipaj parvoz qilgan va manzilga taxminan olti soat kechikib qo‘ngan.
AQSHda samolyotlar ishtirokidagi so‘nggi aviahodisalar:
25-yanvar Alyaska yarim orolida AQSHning F-35A qiruvchi samolyoti qulab tushdi. Uchuvchi katapulta qilishga ulgurdi va tirik qoldi.
30-yanvar kuni ertalab American Airlines yo‘lovchi samolyoti Vashington aeroporti yaqinida harbiy vertolyot bilan to‘qnashdin, so‘ngra Potomak daryosiga quladi. Oqibatda hech kim omon qolmadi, 5-fevral kuni aviahalokatda halok bo‘lgan barcha 67 kishining jasadi Vashingtondagi daryodan olib chiqildi.
1-fevral kuni AQSHning Filadelfiya shahrida aviahalokat yuz berdi: tez tibbiy yordam samolyoti turar joy hududiga qulab tushdi, uylar va avtomobillarga zarar yetdi.
7-fevral kuni bortida 10 kishi bo‘lgan samolyot Alyaskada g‘oyib bo‘ldi.
11-fevralda esa Arizonadagi aeroportda ikkita samolyot to‘qnashib ketdi. Favqulodda vaziyat oqibatida bir kishi halok bo‘ldi, yana uch kishi jarohat oldi.
12-fevralda AQSH harbiy-dengiz kuchlarining samolyoti San Diego ko‘rfaziga qulab tushdi. Aviahalokat Nort-Aylend harbiy aviabazasi yaqinida yuz bergan. Samolyot bortida ikki kishi bo‘lgan. Ularni baliq ovlash kemasi qutqarib qolgan.
19-fevral AQSHning Arizona shtati osmonida 19-fevral kuni kichik samolyotlar to‘qnashdi, oqibatda ikki kishi halok bo‘ldi. Har bir samolyot bortida ikkitadan odam bo‘lgan. To‘qnashuv Tuson shahri yaqinida sodir bo‘lgan. To‘qnashuvdan so‘ng Cessna 172 samolyoti xavfsiz qo‘nishga muvaffaq bo‘lgan. Biroq Lancair 360 MK II uchish-qo‘nish yo‘lagi yaqinida yerga qulab, yonib ketgan.
25-fevral Amerikaning Southwest Airlines aviakompaniyasining yo‘lovchi samolyoti Chikagodagi Miduey xalqaro aeroportiga qo‘nish chog‘ida xususiy samolyot bilan to‘qnashishiga bir baxya qoldi. Yo‘lovchi samolyoti so‘nggi daqiqada havoga ko‘tarilishga majbur bo‘lgan.
Izoh (0)