Fransiya AQSH mintaqadan qo‘shinlarini olib chiqqan taqdirda, Germaniyaga yadro quroliga ega qiruvchi samolyotlarni joylashtirishi mumkin. Bu haqda The Telegraph xabar berdi.
Germaniyaning bo‘lajak kansleri Fridrix Merz Yevropa endi AQSH prezidenti Donald Tramp ma’muriyati himoyasiga tayanmasligi kerakligini aytgandi. U Fransiya va Britaniya bilan yadroviy himoya bo‘yicha muzokaralar olib borishga chaqirgan.
Fransiya Yevropani himoya qilish uchun o‘z yadroviy qalqonidan foydalanishga tayyor... U AQSHning qit’adan o‘z qo‘shinlarini olib chiqish tahdidi fonida Germaniyaga yadro quroliga ega qiruvchi samolyotlarni yuborishi mumkin, deyiladi xabarda.
Ismi oshkor etilmagan fransuz amaldori bunday qadam Rossiyaga “signal” bo‘lishini aytmoqda. Berlindagi diplomatlar esa bu Britaniyani Fransiyadan o‘rnak olishga majbur qilishini ta’kidlagan.
Hozirda Fransiyaning yadroviy tiyib turishi NATOga bog‘liq emas, Britaniya esa alyans mudofaa strategiyasining asosiy qismidir. Taxminlarga ko‘ra, Parij arsenalida dengiz va havodan uchirish imkoniyatiga ega 300 ga yaqin yadro quroli mavjud.
Biroq agar amerikaliklar Germaniyadan yadroviy tiyib turish vositalarini olib chiqmasa, bu sodir bo‘lmaydi. Vashington Yevropa xavfsizligini 100 ga yaqin yadroviy raketa arsenali bilan kafolatlaydi, ularning aksariyati AQSHning Germaniyadagi harbiy bazasiga joylashtirilgan.
Fransiya Moskvagacha yetib boradigan ballistik raketa yaratmoqchi — OAV
Fransiyada zarba berish radiusi 1000 kilometrgacha bo‘lgan o‘rta masofali ballistik raketa ishlab chiqish imkoniyati ko‘rib chiqilmoqda. Loyiha Fransiya Qurolli kuchlari qo‘mondonligi va bosh boshqarmasi o‘rtasida muhokama qilingan.
Tashabbus Ukrainadagi urush paytida Rossiya tomonidan qo‘llanilgan ballistik raketalarning samaradorligini tahlil qilishga asoslanadi. Rossiya 21-noyabr kuni o‘zining “Oreshnik” ballistik raketasi bilan Dneprga zarba bergandi, yuqori tezligi tufayli uni tutib olish deyarli imkonsiz.
Ukrainaning harbiy texnika va qurol-yarog‘larga ixtisoslashgan Defense Express konsalting kompaniyasi hisob-kitoblariga ko‘ra, 1000 kilometrlik masofa Boltiqbo‘yi davlatlaridan uchirilganda raketalarga Moskva va Nijniy Novgoroddagi nishonlarni urishga imkon beradi. Bunday uzoqlikdagi raketa ehtimol ixcham bo‘ladi, bu uni ishlab chiqish xarajatlarini kamaytirish va sezilarli miqdorda ishlab chiqarish imkonini beradi.
Izoh (0)