AQSH tabiatni muhofaza qilish tadqiqot markazi xabar berishicha, Kanzi laqabli 44 yoshli bonobo (shimpanze turi) hayotdan ko‘z yumdi. Maymun o‘zining noyob kognitiv qobiliyatlari bilan mashhur edi.
Dunyodagi eng aqlli maymun Kanzi 300 dan ortiq iboralarni tushunar, leksigram belgilari, imo-ishoralar yordamida muloqot qilar va hatto Pacman va Minecraft kabi videoo‘yinlarni o‘ynay olar edi.
“Kanzi ko‘plab odamlar uchun katta ahamiyatga ega edi. Markazimizning tadqiqotchilar jamoasi uning o‘limidan chuqur qayg‘udamiz. U o‘z oilasining sevimli a’zosi va barchamizning do‘stimiz edi”, deyiladi Ape Intiative bayonotida.
O‘tgan haftada xodimlar shimpanzeni jonsiz holatda topishdi:
“O‘sha kuni u o‘zini yaxshi his qilgan edi va unda hech qanday kasallik alomatlari ham yo‘q edi. Hozirda mutaxassislarimiz shimpanze o‘limining sababini aniqlash uchun test natijalarini kutishmoqda. Bundan avval Kanzi yurak xastaligidan davolanayotgan edi, lekin muntazam ravishda EKG tekshiruvidan o‘tar va qon bosimi kuzatib borilar edi”, deyiladi xabarda.
Ma’lumot uchun, Kanzi laqabli maymun 1980-yilda tug‘ilgan va yoshligidan olimlarning onasiga belgilar tilini o‘rgatayotganini kuzatib katta bo‘lgan. Ma’lum vaqtdan so‘ng, maymun hech qanday yordam va o‘quvlarsiz leksigrammalardan foydalana boshlagan va to‘g‘ridan to‘g‘ri ta’lim olmay, yangi tilni tabiiy ravishda o‘zlashtirgan birinchi maymunga aylangan. Dastlab u o‘nta so‘zni tushuna boshlagan, so‘ng uning so‘z boyligi kengayib, 300 ta so‘zga yetgan.
Izoh (0)