19-mart kuni Ukraina prezidenti Vladimir Zelenskiy va AQSH prezidenti Donald Tramp o‘rtasida telefon orqali suhbat bo‘lib o‘tdi. Bir soatdan ortiq vaqt davom etgan muloqot juda yaxshi kechgan. Bu haqda Amerika rahbari Truth Social ijtimoiy tarmog‘ida yozib qoldirdi.
“Hozirgina Ukraina prezidenti Zelenskiy bilan juda samarali telefon suhbati bo‘lib o‘tdi. U taxminan bir soat davom etdi. Suhbatning asosiy qismi Rossiya va Ukrainaning talab va ehtiyojlarini muvofiqlashtirish maqsadida kecha Rossiya Federatsiyasi prezidenti Vladimir Putin bilan o‘tkazilgan muzokaraga asoslandi”, deya ta’kidladi Tramp.
Amerika rahbarining aytishicha, u AQSH davlat kotibi Marko Rubio va milliy xavfsizlik bo‘yicha maslahatchisi Mayk Uoltsdan muhokama qilingan masalalarning batafsil tavsifini berishni so‘ragan. Yaqin vaqt ichida tegishli bayonot e’lon qilinishi kutilmoqda.
18-mart kuni AQSH prezidenti Donald Tramp va Rossiya prezidenti Vladimir Putin o‘rtasida Ukraina urushi bo‘yicha muhim telefon muloqoti bo‘lib o‘tdi. Suhbat yakunida yetakchilar Rossiyaning Ukraina energetika infratuzilmasiga hujumlarini 30 kunga to‘xtatishga kelishib oldilar.
Ikki soat davom etgan muloqot davomida Rossiya prezidenti Vladimir Putin Trampga Kiyevga xorijiy harbiy yordam va razvedka ma’lumotlarini berishni to‘liq to‘xtatish Ukrainadagi mojaroning yanada avj olib ketmasligi uchun eng muhim shart ekanini aytgan. Shuningdek, u Ukraina harbiy safarbarlikni to‘xtatishi kerakligini so‘ragan.
AQSH prezidenti Donald Tramp muloqotdan so‘ng o‘zining Truth Social ijtimoiy tarmog‘idagi sahifasida munosabat bildirib, Rossiya prezidenti bilan “tinchlik shartnomasining ko‘p qismlarini” muhokama qilgani va mojaroni “to‘liq kuch bilan” hal etish jarayoni boshlanganini ma’lum qildi.
Izoh (0)