Bir kecha uchun kamida 8 ming dollar: Jahon yulduzlari dam oladigan dunyoning eng qimmat kurortlari

Bir kecha uchun 25 ming dollarga mehmonxona? Bu baʼzi odamlar uchun umuman muammo emas. Ammo bunday narx oqlanishi kerak. Dunyoning eng qimmat kurortlari o‘zlarining boy va mashhur mehmonlariga shuncha pul evaziga nima taklif qilishlari mumkin? Quyida shu haqda so‘z yuritamiz.

Four Seasons Resort Bora Bora

Qayerda joylashgan: Bora-Bora, Fransiya Polineziyasi.

Dam olish narxi: Oddiy xonada 1 kecha uchun 1500 dollardan hashamatli villalarda kuniga 25 ming dollargacha.

Kim dam oladi: Jastin Biber, Nikol Kidman, Leonardo Di Kaprio.

Bu kurortda siz hashamdor va didsiz uslubdagi, hamda oltin bilan qoplangan hojatxonalarni uchratmaysiz. Kurort tashqi tomondan qamish tomli kulbalardan iborat baliqchilar qishlog‘iga o‘xshaydi.

Ammo o‘zingiz tasavvur qiling-a, bunday “kulbada” uyg‘onasiz, terrasaga chiqasiz, atrofingizda esa firuza rangdagi, kristall singari tiniq okean sizni kutib oladi. Aytgancha, baʼzi xonalardagi pollar shaffof, shuning uchun siz hatto uxlab yotganingizda ham suv osti dunyosini tomosha qilishingiz mumkin.

Shuningdek eksklyuziv spa muolajalari va Mishlen yulduzli oshpazlar pishiradigan restoranlar ham shu pul ichiga kiradi.

The Maldives Private Island by Soneva

Qayerda joylashgan: Maldiv orollari.

Dam olish narxi: 1 kecha uchun 2000 ming dollardan butun orolni ijaraga olish uchun 50 ming dollargacha. 

Kim dam oladi: Beyons, Jay-Z, Kim Kardashyan.

Bu joy tabiati bilan Maldivni eslatadi: xuddi shu ekologik dizayn orqali oliy darajadagi individual xizmat. Ehtimol, yulduzli mehmonlarni ko‘proq Soneva xususiy orolida tashqi dunyodan to‘liq ajralib qolish ham jalb qilar?

Amangiri

Qayerda joylashgan: Yuta, AQSH.

Dam olish narxi: 1 kecha uchun 3 ming dollardan.

Kim dam oladi: Opra Uinfri , Kayli Jenner.

Endi xuddi shu firuza rangdagi dengizli jannatni cho‘l o‘rtasida tasavvur qiling. Ishoning, ertaknamo dam olish faqat dengiz qirg‘og‘ida emas, balki cho‘l o‘rtasida ham bo‘lishi mumkin. Go‘zal manzaralar, kanyonlar va tog‘lar, vertolyotli ekskursiyalari, panorama ko‘rinishli xonalar — bularning barchasini amerikalik Amangiri mehmonxonasi taklif qiladi.

Emirates Palace

Qayerda joylashgan: Abu-Dabi, BAA.

Dam olish narxi: 1 kecha uchun 1 000 dollardan prezidentlik lyuksida 20 ming dollargacha.

Kim dam oladi: Bill Geyts, BAA qirollik oilasi aʼzolari.

Bu yerga boy sayyohlarni 1,3 km uzunlikdagi xususiy plyaj, ichki bezaklariga oltindan ishlov berilgan saroy uslubidagi arxitektura, oltin qo‘shilgan shirinliklar taklif qiladigan restoranlar jalb qiladi.

The Brando

Qayerda joylashgan: Tetiaroa oroli, Fransiya Polineziyasi.

Dam olish narxi: 1 kecha uchun 3 500 dollardan.

Kim dam oladi: Barak Obama, Ellen DeJeneres

Bu ekologik kurort Don Karleone rolini ijro etgan Marlon Brando tomonidan yaratilib, mashhur aktyor nomi bilan atalgan. Bu yerda dam olish mafiya xo‘jayiniga loyiq tarzda tashkillashtirilgan bo‘lib, basseynli va plyajga kirish imkoniyati bo‘lgan xususiy villalar, sho‘ng‘ish bilan shug‘ullanish va marjon riflari bilan tanishish imkoniyati mavjud.

Ijtimoiy hayotdan charchagan, yolg‘izlik va xotirjamlikni qadrlovchi mashhurlar

The Brando’da dam olishadi. Kurort shunchalik tinch va sokinki “Orolda bizdan boshqa hech kim yo‘qdek go‘yo!”, deb yozilgan bir sharhda.

 Shimoliy orol, Seyshel orollari

Qayerda joylashgan: Seyshel orollari.

Dam olish narxi: 1 kecha uchun 5 000 dollardan.

Kim dam oladi: shahzoda Uilyam va Keyt Midlton bu yerda asal oyi o‘tkazgan.

Bu 11 ta villasi bo‘lgan xususiy orol bo‘lib har birining o‘ziga xos plyaji bor. Yolg‘iz dam olish uchun ideal joy. Eksklyuziv spa-muolajalari va dayving (suvga sho‘ng‘ib suzish) bilan ham shug‘ullanish mumkin.

Laucala Island Resort

Qayerda joylashgan: Fiji

Dam olish narxi: 1 kecha uchun 5 800 dollardan.

Kim dam oladi: Opra Uinfri, Mik Jagger.

25 ta villasi bo‘lgan xususiy orol, har birining basseyn va plyaji bor. U yerda golf, sho‘ng‘ish va ot minish bilan shug‘ullanish mumkin.

Organik ferma restoranlarni yangi mahsulotlar bilan taʼminlaydi. Har bir villaning o‘z xizmatkori va boshqa xizmat ko‘rsatuvchilari bor, mahalliy oshpazlar esa buyurtma bo‘yicha har qanday taomni tayyorlab beradilar.

Cheval Blanc Randheli

Qayerda joylashgan: Maldiv orollari

Dam olish narxi: 1 kecha uchun 2500 dollardan boshlanadi.

Kim dam oladi: Devid va Viktoriya Bekhemlar

Sizni Lui Vuitton dizayni bilan bezatilgan villalar, suv osti spa-markazi va Mishlen yulduzli oshpazlar ishlaydigan restoranlar kutmoqda. Bundan tashqari har bir mehmon uchun shaxsiy gid taqdim etiladi.

Necker oroli

Qayerda joylashgan: Britaniya Virjin orollari.

Dam olish narxi: Bir tun uchun 5000 dollardan yoki butun orolni ijaraga olish uchun 80 ming dollardan. 

Kim dam oladi: Opra Uinfri, Keyt Moss, Stiven Spilberg.

Orol Richard Bransonga tegishli bo‘lib, u kurortini yulduzli mehmonlar uchun eksklyuziv dam olish uchun to‘liq ijaraga berishdan mamnun. Dam olish imkoniyatlari orasida keyserfing, tennis va yoga mavjud.