Chexiya Rossiya bilan urush tugaganidan keyin Ukrainadagi tinchlikparvar missiyaga qo‘shiladi. Bu haqda mamlakat prezidenti Pyotr Pavel “Yevropeyskaya pravda” gazetasiga bergan intervyusida ma’lum qildi.
Prezident so‘zlariga ko‘ra, Praga allaqachon Ukrainaning Rossiya bilan kelishuvlariga rioya etilishini nazorat qilish uchun qo‘shinlar yuborishni xohlovchilar koalitsiyasiga kirgan. Hozirda buning muhokamasi davom etmoqda va “kontingentni jo‘natishga umumiy tayyorgarlik boshlangach, Chexiya uning bir qismi bo‘ladi”, dedi Pavel.
Shuningdek, u Chexiya Ukrainaga xavfsizlik kafolatlarini taqdim etadigan davlatlar qatoriga kirishini ta’kidladi. Siyosatchi buni “o‘zimizni (Chexiyani) himoya qilish” uchun kerak deb atadi. Pavel bu borada turli fikrlar bo‘lsa-da, qo‘shin yuborishga tayyor kuchli Yevropa davlatlari guruhi tarkibida Chexiya bo‘lishi kerakligini aytdi.
U Ukrainadagi xavfsizlikni ikkita asosiy omil ta’minlashini qayd etdi: Yevropa tinchlikparvar kuchlari va AQSH biznesining faol ishtiroki. Pavelning fikriga ko‘ra, Ukraina NATOga a’zo bo‘lish masalasini ko‘rib chiqishdan voz kechmaslik kerak. Chunki “siyosatchilar kelib, ketadi” va uch yil ichida AQSHda yangi hukumat bo‘lishi mumkin, u o‘z qarashlariga ega bo‘ladi.
Ukrainaga xorijiy kontingentni yuborish masalasi
Rossiya bilan urush tugaganidan keyin Ukrainaga tinchlikparvar kuchlarni yuborish missiyasiga Buyuk Britaniya va Fransiya boshchilik qilmoqda. Turkiya, Kanada va Avstraliya ushbu maqsadlar uchun o‘z qo‘shinlarini ajratishga allaqachon rozi bo‘lgani aytilmoqda. Yana 30 dan ortiq davlat missiyani, jumladan, qurol-yarog‘ va moddiy-texnik jihatdan qo‘llab-quvvatlashga tayyor.
Ukrainaga 30 minggacha tinchlikparvar kuchlarni yuborish masalasi muhokama qilinmoqda. Britaniya o‘z harbiylarini muddatsiz joylashtirishni rejalashtirmoqda, ya’ni “tinchlik bitimini saqlab qolish va Rossiyani ushlab turish uchun qancha kerak bo‘lsa, shuncha”. 27-mart kuni koalitsiya mamlakatlari majburiyatlarning tafsilotlarini muhokama qilish uchun yana yig‘iladi.
Bu orada Xitoy tashabbusga e’tibor qarata boshladi. Yevropa Ittifoqi diplomatik doiralaridagi manbalarga ko‘ra, Pekin o‘z diplomatlari orqali missiyada ishtirok etish masalasini ko‘targan. Manbalar mazkur qadam Ukrainaga tinchlikparvar kuchlarni yuborish ehtimolini oshirishini aytmoqda.
Rossiya qanday munosabatda?
Bloomberg agentligining Kremldagi manbalari Rossiya prezidenti Vladimir Putin tinchlikparvar kuchlar sifatida aynan Xitoy yoki boshqa “neytral” davlatlar qo‘shinlarini ko‘rishni istayotgani, Yevropa kontingenti ishtirokiga qarshi chiqayotganini ma’lum qilgan. Tashqi ishlar vaziri Sergey Lavrovning tushuntirishicha, Ukrainada NATO kuchlarining har qanday bayroq ostida paydo bo‘lishi urushning “asosiy sabablari” yo‘qolmaganini anglatadi.
Izoh (0)