Jahon chempionati saralashi doirasidagi bir qancha uchrashuvlar yakunlandi. Eron va Argentina muddatidan avval Mundial yo‘llanmasini qo‘lga kiritishni uddaladi hamda musobaqa masalasini hal qilgan jamoalar qatoriga qo‘shildi.
25-mart kuni Osiyo qit’asidagi saralash bosqichi A guruhidagi Eron — O‘zbekiston bahsi bo‘lib o‘tdi. Uchrashuvda 2:2 natijasi qayd etildi. Ushbu durangdan keyin forslar hisobidagi ochkolar soni 20 ta bo‘ldi hamda 2026-yilgi Mundialga yo‘llanma oldi.
Janubiy Amerika mamlakatlari o‘rtasidagi Jahon chempionati saralashi ham qizg‘in pallaga yetib keldi. 26-mart tongida ushbu qit’aning ikki nomdor jamoasi — Argentina hamda Braziliya terma jamoalari maydonga tushdi. Unda mezbon Argentina yirik 4:1 hisobida g‘alaba qozondi va 4 yillikning eng nufuzli musobaqasiga boradigan mamlakatlar ro‘yxatiga qo‘shildi.
2026-yilgi Jahon chempionati 3 ta mamlakatda o‘tkaziladi — AQSH, Meksika va Kanada. Ular mezbon jamoa sifatida musobaqada ishtirok etishadi. Shuningdek, Osiyo qit’asining yana bir vakili Yaponiya ham JCH masalasini hal qilgan. Yangi Zelandiya esa Okeaniya mintaqasi saralash uchrashuvi finalida Yangi Kaledoniyani mag‘lub etib, mundialning 5-ishtirokchisiga aylangan. Eron 25-mart kuni O‘zbekiston bilan durang o‘ynadi hamda 4 yilda bir marta o‘tkaziladigan musobaqaning final bosqichiga yo‘llanma oldi. Argentina esa yo‘llanmaga ega chiqqan 7-jamoaga aylandi.
Jahon chempionati yo‘llanmasiga ega chiqqan jamoalar:
1. AQSH (mezbon)
2. Meksika (mezbon)
3. Kanada (mezbon)
4. Yaponiya (Osiyo)
5. Yangi Zelandiya (Okeaniya)
6. Eron (Osiyo)
7. Argentina (Janubiy Amerika)
Ma’lumot uchun, AQSH, Meksika va Kanada maydonlarida o‘tadigan musobaqa uchun Osiyo qit’asiga 8,5 ta kvota ajratilgan. 3 ta guruhdagi 1 va 2-o‘rinlarni egallagan jamoalar to‘g‘ridan to‘g‘ri yo‘llanma olsa, guruhlardagi 3—4-o‘rindagi jamoalar pley-offlar orqali qolgan 2,5 ta yo‘llanma uchun kurash olib boradi.
Izoh (0)