The Atlantic bosh muharriri Jeffri Goldberg Donald Tramp jamoasining maxfiy guruhdagi yozishmalarini kuzatgani ma’lum bo‘ldi. Signal deb nomlangan messenjerdagi chat havolasini jurnalistga AQSH prezidentining milliy xavfsizlik bo‘yicha maslahatchisi Maykl Uolts yuborgan. Goldberg Oq uy vakillari u bilan shaxsan bog‘lanmoqchi deb o‘ylab, guruhga qo‘shilgan.
Jurnalistning ma’lum qilishicha, ushbu guruhda Yamandagi husiylariga zarba berish masalasi muhokama qilingan. Unga ko‘ra, chatda jami 18 nafar ishtirokchi bo‘lgan. AQSH vitse-prezidenti JD Vens, davlat kotibi Marko Rubio, mudofaa vaziri Pit Xegset va maxsus vakil Stiv Uitkoff kabilar shular jumlasidan.
Muhokamalar davomida JD Vens husiylarga zarba masalasini so‘roq ostiga olgan. “O‘ylashimcha, biz xatoga yo‘l qo‘yyapmiz”, degan u. AQSH vitse-prezidenti, shuningdek Yevropaning 40 foiz savdosi Suvaysh kanali orqali amalga oshirilishini eslatib, Amerika jamoatchiligi Oq uyning bu qarorini tushunmasligi ehtimolidan xavotir bildirgan. Bundan tashqari, Trampning ko‘rsatmasi Yevropaga doir joriy siyosatga mos kelmasligi mumkinligiga shama qilgan. Shu bilan birga, u “Yevropani yana qutqarishdan nafratlanishini” qo‘shimcha qilib o‘tgan.
-nDpaJStB.avif)
SM nomli profil esa AQSH prezidenti Yamanga zarbalar uchun “yashil chiroq” yoqqanini, biroq Suvaysh kanali bo‘ylab kemalar qatnovini tiklash evaziga iqtisodiy manfaat olinishi kerakligini ta’kidlagan. Taxminlarga ko‘ra, u Tramp jamoasidagi maslahatchilardan biri Stiven Miller bo‘lishi mumkin.
“Ammo biz tez orada Misr va Yevropaga bu harakat evaziga nima kutayotganimizni aniq bayon qilishimiz kerak. Shuningdek, bunday talabni qanday amalga oshirishni ham hal qilishimiz zarur. Masalan, agar Yevropa xarajatlarimizni qoplamasa nima bo‘ladi? Agarda navigatsiya erkinligini katta mablag‘ sarflab tiklasak, buning evaziga qandaydir iqtisodiy foyda olishimiz kerak”, degan u.
Goldbergning so‘zlariga ko‘ra, mudofaa vaziri Pit Xegset Yamanga uyushtiriladigan hujumlarning batafsil rejasi, nishonlarning koordinatalari hamda qurollar turini chatda oshkor qilgan. Jurnalist buni avvaliga “prank” deb o‘ylagan. Biroq oradan ko‘p o‘tmay, husiylarning pozitsiyalari chindan ham nishonga olina boshlagan. Guruh ishtirokchilari esa bir-birini muvaffaqiyat bilan tabriklagan.
Shundan so‘ng Goldberg guruhni o‘z ixtiyori bilan tark etib, chatda bo‘lgan barcha amaldorlarga rasmiy so‘rov yuborgan. AQSH Milliy xavfsizlik kengashi matbuot kotibi Brayyan Hyuz jurnalist nazarda tutgan maxfiy guruh haqiqatda borligini tasdiqladi.
Biroq Pentagon rahbari Pit Xegset jurnalistning ayblovlarini rad etib, “hech kim harbiy reja haqida xabar yuborganini” ta’kidladi. U, shuningdek, Goldbergni “yolg‘onchi va ishonchsiz jurnalist” deb atab, “haqiqatni doimiy ravishda buzish orqali martaba orttirish”da aybladi.
Bu borada AQSH prezidentidan ham izoh so‘raldi. Donald Tramp jurnalistning chatga qo‘shilgani haqida hech narsa bilmasligini aytib: “Men bu haqda hech narsa bilmayman. The Atlantic esa tez orada yopiladigan jurnal”, deya javob qaytardi.
Politico nashri mazkur mojaro sabab maslahatchi Maykl Uolts ishdan bo‘shatilishi mumkinligini ma’lum qildi.
“U kimlar yozishmada ishtirok etayotganini tekshirmasdan beparvolik qildi. Bunday muhokamalarni Signal’da olib borish o‘ta loqaydlik edi. Milliy xavfsizlik bo‘yicha maslahatchi bunday xatolarga yo‘l qo‘ymasligi kerak”, degan nashr manbalaridan biri.
Qayd etilishicha, Tramp jamoasidan kamida ikki nafar amaldor Maykl Uolts iste’fosiga chiqishi zarur deb hisoblaydi.
Izoh (0)