Amerikalik tadbirkor, media magnat, kompyuter muhandisi va “Amazon” asoschisi Jeff Bezos joriy yil yozda uylanishi haqida ma’lum qildi. Bo‘lajak er-xotin to‘y marosimi mehmonlariga rasmiy taklifnoma yuborgan.
Xorijiy OAV larga ko‘ra, nikoh oqshomi Venetsiyada bo‘lib o‘tishi mumkin. Avvalroq Jeff va Loren Italiya sohilidagi 500 million dollarlik “Koru” yaxtasida turmush qurishlari haqida xabarlar tarqalgan edi, biroq bu maʼlumot hozircha tasdiqlanmagan va inkor ham qilinmagan.
Milliarderning bo‘lajak turmush o‘rtog‘i Loren Sanches amerikalik jurnalist, teleboshlovchi va biznesmen ayol. U Fox News va “Good Day LA” kabi mashhur dasturlarda boshlovchilik qilgan. Shuningdek, Loren professional uchuvchi bo‘lib, “Black Ops Aviation” deb nomlangan aerosyomka kompaniyasiga asos solgan.
Foto: Marie Claire
Jeff Bezos va Loren Sanches unashtirilganidan deyarli 2 yil bo‘ldi. 2023-yil may oyida 5 yillik munosabatlardan Bezos Sanchesga turmush qurishni taklif qilgan. So‘ng Lorenni 20 karatlik olmos bilan bezatilgan yirik uzuk taqib yurgani paparat`silarga tushgan. Hisob-kitoblarga ko‘ra, unashtiruv uzugi 2,5 million dollarga teng bo‘lishi mumkin.
2023-yil avgust oyida juftlik unashtiruv marosimi o‘tkazdi. Tadbirga Bill Geyts, Iordaniya qirolichasi Raniya, Kris Jenner, Salma Hayek, Miranda Kerr va boshqa mashhur shaxslar tashrif buyurdi. Bayram Pozitanodagi yaxtada bo‘lib o‘tdi.
2023-yilning noyabr oyida esa Loren to‘yga tayyorgarlik haqidagi dastlabki tafsilotlarni Vogue nashri bilan o‘rtoqlashdi:
“Biz hali ham to‘y haqida, uning qanday o‘tkazilishi haqida o‘ylayapmiz. Marosim katta bo‘ladimi? Chet elda bo‘ladimi? Hozircha bir qarorga kela olmadik”, degan edi u.
Ma’lumot uchun, Jeff va Loren 2019-yilda uchrasha boshlagan. O‘sha yili milliarder sobiq rafiqasi Makkenzi Skott bilan ajrashdi. Ular 25 yil birga yashab, to‘rt farzand –— uch o‘g‘il va asrab olingan bir qizni tarbiyalagan.
Loren Sanches esa 13 yillik turmushdan keyin 2019-yilda sobiq eri Patrik Uaytsell bilan ajrashdi. Uning ikki nafar farzandi — Patrikdan bir o‘g‘il va sobiq sevgilisi Toni Gonsalesdan yana bir o‘g‘li bor.
Izoh (0)