Rossiya prezidenti Vladimir Putin va AQSH prezidenti Donald Tramp 18-mart kuni telefon orqali muloqot o‘tkazdi. Muloqot 2 soat 28 daqiqa davom etgan. Kreml muloqot yuzasidan bayonot berdi.
Yetakchilar Ukraina atrofidagi vaziyat yuzasidan batafsil va ochiq fikr almashishgan. Vladimir Putin Donald Trampga harbiy harakatlar va inson yo‘qotishlarini to‘xtatishdek ezgu maqsadga erishishga hissa qo‘shishga intilgani uchun minnatdorlik bildirgan.
Suhbat yakunida Putin Trampning Rossiya va Ukraina 30 kun davomida energetika infratuzilmasiga zarba berishdan o‘zaro voz kechish g‘oyasini qo‘llab-quvvatlab, harbiylarga shu haqda ko‘rsatma bergan.
Muzokaralar natijasida Rossiya va Ukraina o‘rtasida harbiy asirlarni almashish bo‘yicha kelishuvga erishilgan bo‘lib, u 175 ga 175 nisbatda amalga oshiriladi.
Bundan tashqari Rossiya yaxshi niyat ramzi sifatida 23 nafar og‘ir yaralangan ukrainalik harbiyni Kiyevga topshiradi.
Suhbatda davlat rahbarlari Ukraina Qurolli Kuchlarining Kursk viloyatidagi boshqa bo‘linmalari taqdiri haqida ham fikr almashgan.
“Donald Trampning Kursk viloyatida qurshovda qolgan ukrainalik harbiy xizmatchilar hayotini saqlab qolish haqidagi so‘nggi murojaatiga javoban, Vladimir Putin Rossiya tomoni insonparvarlik tamoyillariga amal qilishga tayyorligini va asirga tushgan taqdirda Ukraina Qurolli Kuchlari askarlariga Rossiya qonunlari hamda xalqaro huquq normalariga muvofiq hayot va munosib muomala kafolatlanishini tasdiqladi”, deyiladi bayonotda.
Kreml bayonotida ta’kidlanishicha Rossiya prezidenti mojaroni tinch yo‘l bilan hal etishga qat’iy sodiqligini tasdiqlab, amerikalik hamkorlar bilan birgalikda hal qilishning keng qamrovli, barqaror va uzoq muddatli bo‘lishi lozim bo‘lgan yo‘llarini puxta ishlab chiqishga tayyorligini bildirgan.
“Albatta bunda inqirozning asl sabablarini bartaraf etish zarurligi va Rossiyaning xavfsizlik sohasidagi qonuniy manfaatlarini hisobga olish kerakligi ta’kidlandi”, deyiladi bayonotda.
Shuningdek, mojaro avj olishiga yo‘l qo‘ymaslik va uni siyosiy-diplomatik yo‘l bilan hal qilish bo‘yicha ish olib borishning asosiy sharti Kiyevga xorijiy harbiy yordam va razvedka ma’lumotlarini taqdim etishni to‘liq to‘xtatish bo‘lishi kerakligi ta’kidlangan.
“Yetakchilar Ukraina masalasini ikki tomonlama tartibda, shu jumladan AQSH prezidentining yuqorida qayd etilgan takliflarini hisobga olgan holda hal etishga erishish bo‘yicha sa’y-harakatlarni davom ettirish niyatida ekanligini tasdiqladi. Shu maqsadda Rossiya va Amerika ekspert guruhlari tuzilmoqda”, deyiladi Kreml bayonotida.
Ta’kidlanishicha, prezidentlar ko‘tarilgan barcha masalalar yuzasidan doimiy aloqada bo‘lishga kelishib olgan.
Avvalroq, AQSH prezidenti Donald Tramp 18-mart kuni rossiyalik hamkasbi Vladimir Putin bilan bo‘lib o‘tadigan suhbatda qaysi hududlar Rossiya nazoratida qolishini muhokama qilishi xabar berilgandi.
Izoh (0)