NATO bosh kotibi Mark Rutte Ukrainaning Shimoliy Atlantika alyansiga a’zo bo‘lishi masalasi endi kun tartibida yo‘qligini tasdiqladi. U bu haqda Bloomberg TVga bergan intervyusida ma’lum qildi.
“Qo‘shma Shtatlar prezidenti Ukrainaning NATOga kirishi masalasini chindan ham muzokaralar mavzusidan chiqaryaptimi?” degan savolga Rutte “Ha” deya javob berdi.
Shuningdek, u sulh tuzilgan taqdirda ham NATO Ukrainada o‘t ochishni to‘xtatishni ta’minlashda ishtirok etmasligini ta’kidlagan.
Ayni shu suhbatda alyans bosh kotibi 2025-yilda Ukrainadagi jang harakatlarini to‘xtatish imkoniyatini ijobiy baholayotganini bildirdi.
Rutte Rossiya bilan munosabatlar Ukrainadagi urush tugaganidan so‘ng tiklanishi kerakligini ham aytib o‘tgan.
“Harbiy mojaro yakunlangach, Yevropa va AQSH asta-sekin Rossiya bilan normal munosabatlarni tiklashni boshlasa yaxshi albatta. Biroq, biz hali bu darajaga yetganimiz yo‘q. Rossiyaning muzokaralarga jiddiy yondashishiga ishonch hosil qilish uchun ularga bosim o‘tkazishni davom ettirishimiz zarur”, deb ta’kidladi alyans rahbari Bloomberg TV bilan suhbatda.
2008-yil aprelda Buxarestdagi NATO sammitida ittifoq a’zolari yakuniy bayonotga Ukraina va Gruziyaga “bir kun kelib ular NATOga a’zo bo‘lishi” haqidagi yozma va’dani kiritgan. 2023-yil iyulda esa Vilnyusdagi NATO sammiti bayonotida ham “Ukrainaning kelajagi NATOda” deyilgandi. Biroq yana aniq muddatlar ko‘rsatilmagan.
2024-yilda Vashingtondagi sammitda ittifoq Ukraina NATOga qo‘shilishini “qaytarib bo‘lmas yo‘lda” ekanligini e’lon qilgan. Bu ta’rifni NATOning o‘sha paytdagi bosh kotibi Yens Stoltenberg va uning vorisi Mark Rutte deyarli yarim yil davomida o‘z nutqlarida takrorlab keldi.
2025-yil yanvarda Donald Tramp ma’muriyati Oq uyga kelgach va yangi ma’muriyatdan AQSHning yangi siyosati bo‘yicha tushuntirishlar olgach, Rutte NATO hech qachon Ukrainani qabul qilish bo‘yicha aniq va’dalar bermaganini ma’lum qildi.
Izoh (0)