2002-yilda “Yoshlar” telekanalining kechki dasturi orqali efirga uzatilgan Meksikaning “Esmeralda” seriali 1997-yilda suratga olingan bo‘lib unda bosh rollardan birini meksikalik taniqli aktrisa Letisiya Kalderon ijro etgan. Quyida Shohida Uzoqovaning ovozi bilan o‘zbekcha gapirib, tomoshabinlar mehrini qozongan ushbu aktrisaning hayot va ijod yo‘li bilan yaqindan tanishamiz.
Qishloqda ulg‘aygan uyatchang qiz
Letisiya Kalderon 1968-yil 15-iyulda Mexiko shahrida dunyoga kelgan. Tug‘ilgandan ko‘p o‘tmay, oilasi Veracruz shtatidagi Alvarado shahriga, so‘ngra Quyi Kaliforniyadagi La-Pas shahriga ko‘chib o‘tgan. Kalderon oilasi Letisiya 13 yoshga kirgandagina poytaxtga qaytib kelgan, uning bolaligi esa qishloqda o‘tgan. Shunga qaramay, u har doim aktrisa bo‘lishni orzu qilardi. Letisiya juda chiroyli va isteʼdodli qiz bo‘lib voyaga yetgan, bundan tashqari uchta akasi bo‘lganligi sababli oilada hammaning sevimlisi edi. Biroq, o‘zining isteʼdodliligiga bo‘lgan ishonchi yo‘q, odamlar orasida juda uyatchang qiz edi. Letisiya o‘zining birinchi kastingiga oila aʼzolarining uzoq vaqt iltimos qilishi tufayli borgan va unga omad kulib boqqan.
Ijoddagi ilk qadamlar
Garchi u “Uchqun” teleserialidagi bosh rolga tasdiqlanmagan bo‘lsa ham, produserlar nazariga tushib qolib, “Televisa” studiyasining o‘quv markaziga bepul o‘qishga taklif qilingan. Tez orada aktrisaning boshlanayotgan karyerasi yuksala boshlagan. 1983-yilda 14 yoshli Letisiya taniqli meksikalik rejissyor Valentin Pimstein tomonidan suratga olingan “Amalia Batista” teleserialida o‘zining birinchi rolini ijro etgan. Ushbu serialda u bosh qahramon Susana Dosamentesning sadoqatli qizi rolini o‘ynagan. Teleserialda birinchi darajali yulduzlarni to‘plagan bo‘lib Letisiya Rosellio Guerra, Alisiya Rodriges va Letisiya Perdigon kabi tajribali aktyorlardan saboq olish imkoniga ega bo‘lgan. Bu serial, yosh aktrisaning karyerasi uchun juda taʼsirli boshlanish bo‘ldi.
“Amalia Batista” dan so‘ng “Principessa” serialida rol ijro etdi, unda Letisiya Anjelikaning ko‘r qizi rolini, “Bianca Vidal” va “Golgota tog‘i” filmlarida esa epizod rollarni, “Maxfiy yo‘l” serialida o‘zining birinchi salbiy qahramon rolini o‘ynagan.
Saksoninchi yillarning ikkinchi yarmida aktrisa tomoshabinlarga allaqachon tanilgan bo‘lsa-da, unga bosh rollarni berishga shoshilmaganlar. 1987-yilda “Bo‘ysunmaydigan” teleserialida Letisiyaga nihoyat omad kulib boqgan. Ushbu serialda Kalderon eng nufuzli meksikalik aktyorlar bilan bir qatorda rol ijro etgan, u paytda atigi o‘n to‘qqiz yoshda edi. “Bo‘ysunmaydigan” seriali ham Meksikada, ham butun dunyoda katta muvaffaqiyatga erishgan, Letisiyaning isteʼdodi butun Lotin Amerikasiga maʼlum bo‘lgan. Garchi dastlab jamoadagi muhit juda og‘ir hamda Kalderon rejissyor Beatrik Sheridan bilan jiddiy kelishmovchiliklarga duch kelgan bo‘lsa-da, yakuniy natija shu mehnatga arzigan, teleserial xalqaro xitga aylangan. Ikki yil o‘tgach, Letisiya “Yo‘l oxiridagi uy” teleserialida o‘zining ikkinchi bosh rolini o‘ynagan, unda uning sherigi maftunkor Eduardo Palomo bo‘lgan. Ushbu biroz gotik hikoyada Gektor Bonilla va Anjelika Aragon ham ishtirok etgan, rejissyorlikni esa Xorxe Fons amalga oshirgan. Serial shoshilinch ravishda suratga olingan, aktyorlarga maxsus qo‘shimchalarsiz “xom” ssenariy berilgan, ammo Letisiya Kalderon o‘z vazifasini aʼlo darajada bajargan.
Qizg‘in ijod
1990-yilda, u Ernesto Alonsoning “Men bu ayolni sotib olaman” teleserialida bosh rolni ijro etadi. Ushbu serial Meksika televizion reytinglarida birinchi o‘rinlarni egalladi, shuningdek, chet elda, ayniqsa Sharqiy Yevropa mamlakatlarida, Italiyada va ayniqsa Vengriyada katta muvaffaqiyat bilan namoyish etildi, u yerda hatto qayta namoyish etildi. Garchi o‘sha paytda Letisiya Kalderonning feʼl-atvori haqida yomon mish-mishlar tarqalgan bo‘lsa-da, Alonso: “U juda yaxshi aktrisa va juda professional inson, men bunday odamlar bilan ishlashni yaxshi ko‘raman. Menimcha, bunday katta isteʼdodga ega bo‘lgan odamlarning intizomli bo‘lishi ajoyibdir” deya fikr bildirgan.
Ijoddagi yutuqlar
1991-yilda u o‘zining aktyorlik isteʼdodini to‘liq ochib berish uchun yana bir ajoyib imkoniyatga ega bo‘ldi. Bu safar Letisiya Kalderon Karlos Sotomayorning “Maksimilian va Valeriya” teleserialida rol o‘ynadi. Qizig‘i shundaki, rejissyorlar ushbu serialga nisbatan katta umidlar qilishmagan, ammo Kalderon tufayli teleserial oxirgacha yuqori reyting bilan davom etgan. Keyinchalik “Maksimilian va Valeriya” hatto Italiya, Ispaniya, Rossiya, Germaniya, Fransiya, AQSH va Braziliyaga sotilgan xalqaro xitga aylandi. Ko‘plab boshqa melodramalardan farqli o‘laroq, bu safar Letisiyaning qahramonining feʼl-atvori juda qiziqarli edi, u har qanday yo‘l bilan hamma narsani olishga tayyor bo‘lgan, injiq va mag‘rur yosh ayol edi. Ushbu rol uchun Kalderon ko‘plab meksikalik televizion mukofotlarga sazovor bo‘ldi.
3 yillik tanaffus
Ushbu teleserialdan keyin Letisiya Kalderon uch yillik tanaffus olishga va o‘zini oilasiga bag‘ishlashga qaror qildi. Letisiya uch yil davomida televizor ekranlarida ko‘rinmasa ham, tomoshabinlar uni unutishmadi.
1997-yilda Letisiya Kalderon ishtirokidagi “Esmeralda” teleseriali efirga chiqdi va bu uning karyerasidagi eng muvaffaqiyatli teleserialiga aylandi. Maʼlumotlarga ko‘ra, Letisiya “Esmeralda” serialidagi ko‘r qiz obraziga shu qadar kirishib ketganki, suratga olish ishlari yakunlangandan keyin ham Esmeralda rolidan chiqib keta olmagan, xuddi u kabi ko‘rga o‘xshab yurishga o‘rganib qolgan.
Shu bilan birga, aktrisa teatr sahnalarida ishtirok etishni boshladi. Ammo Letisiya ijodning ayni cho‘qqisini zabt etganda yana muxlislarning ko‘z o‘ngidan g‘oyib bo‘ldi.
Oilaga bag‘ishlangan 8 yil
Bu safar ijodiy tanaffus sakkiz yil davom etdi. Bu vaqtning barchasida Letisiya o‘zining ikki o‘g‘liga, ayniqsa Daun sindromi bilan tug‘ilgan Luchanoga bag‘ishladi.
Letisiya Xalqaro Daun sindromi kunida: “Bizga rahm-shafqat kerak emas, bizga hurmat kerak” degan yozuv bilan o‘g‘li Luchano Kollado bilan bir qator suratlarni o‘rtoqlashdi.
Kalderon o‘g‘li Luchanodek Daun sindromi bilan yashaydiganlarni meksika jamiyatida, ularning huquqlari uchun doimo kurashgan aktrisalardan biridir. Chunki u ko‘p marta ular duch kelgan jiddiy xatolar va kamsitishlarni ochiq-oydin ko‘rsatgan va ko‘p hollarda bular bilim yetishmasligi tufayli yengib o‘tilmagan.
Izoh (0)