Isroil armiyasi 21-mart kuni G‘azo markazidagi “Turk-Falastin do‘stligi” shifoxonasini portlatib yubordi. U 2023-yil oktyabridan beri havo hujumlari natijasida bir necha bor jiddiy zarar ko‘rgandi. Endi esa butunlay vayron qilindi. Bu haqda Al Jazeera xabar bermoqda.
Mazkur voqea Isroil “Netzarim yo‘lagi” deb ataladigan hududda harbiy harakatlarni kengaytirishi va Salah al-Din ko‘chasini to‘liq to‘sib qo‘yishi ortidan sodir bo‘ldi. Boisi kasalxona ularga yaqin joylashgan. G‘azolik jurnalist Tareq Abu Azzoumning aytishicha, bu saratonga chalingan minglab bemorlarni davolanish imkoniyatidan mahrum qilgan.
Yoqilg‘i zaxiralari yo‘qligi sabab 2023-yil 1-noyabrda yopilgan muasasa avval ham bir necha bor nishonga olingan edi. BMTning ogohlantirishicha, uning butunlay vayron etilishi 70 nafar bemorning hayotini xavf ostida qoldirib, keyinchalik ulardan to‘rt nafarining vafot etishiga olib kelgan. Qayd etilishicha, bunga tibbiy yordam yo‘qligi sabab bo‘lgan.
Jurnalist Abu Azzoumning so‘zlariga ko‘ra, Isroil kuchlari avvalgi jangovar amaliyotlar vaqtida ushbu shifoxonadan qo‘mondonlik markazi sifatida foydalangan. U 2017-yili Turkiyaning 34 million dollarlik yordami bilan qayta qurilgan va jihozlangan edi.
Isroil armiyasi muassasani to‘liq yo‘q qilganini tasdiqladi, biroq u yerda HAMAS a’zolari faoliyat yuritganini isbotlovchi hech qanday dalil keltirmadi.
Turkiya Tashqi ishlar vazirligi Isroil tomonini qoralab, bu “G‘azoni yashashga yaroqsiz qilish va falastinliklarni majburan ko‘chirishga qaratilgan siyosatning bir qismi” ekanini aytdi.
Xalqaro hamjamiyatni Isroilning noqonuniy hujumlari va tizimli davlat terroriga qarshi aniq va ogohlantiruvchi choralar ko‘rishga chaqiramiz, deyiladi vazirlik bayonotida.
“Turk-Falastin do‘stligi” shifoxonasi G‘azodagi eng yirik onkologiya markazi hisoblanib, har yili 30 ming nafargacha saratonga chalingan bemorlarga tibbiy muolaja ko‘rsatish imkoniga ega edi.
Izoh (0)