Bir necha kundan buyon jahon OAV sahifalarida “Epshteyn ro‘yxati” va unda AQSH prezidenti Donald Tramp ham borligi haqida xabarlar tarqalmoqda. Bunday xabarlar Trampning zarariga ishlamoqda va allaqachon nashrlardan birini sudga berishga ulgurdi. Xo‘sh, “Epshteyn ro‘yxati” nima va u nega Trampni xavotirga solmoqda?
Bundan qariyb ikki oy avval Donald Tramp o‘zining maslahatchisi taniqli tadbirkor Ilon Maskni ishdan bo‘shatdi va Oq uydan quvib yubordi.
O‘shanda Mask va Tramp o‘rtasida kelishmovchilik yuzaga keldi va har ikki tomon ijtimoiy tarmoqlar orqali bir-birini ayblay boshladi. Ana shu paytda Mask Trampning Jeffri Epshteyn ishiga aloqadorligi haqida yozdi va tez orada bu postni o‘chirib yubordi.
Shundan so‘ng OAVda yana Jeffri Epshteyn va uning ro‘yxati, unda Tramp ham borligi haqida xabarlar chiqa boshladi. Hatto The Wall Street Journal gazetasi Trampning go‘yo Jeffri Epshteynga behayo rasmli maktub yuborgani haqida maqola e’lon qildi.
Albatta, Tramp ham qarab turmadi va The Wall Street Journal (WSJ) gazetasi va uning egalari ustidan sudga 10 milliard dollarlik da’vo arizasi berdi. Xo‘sh, Jeffri Epshteyn kim, uning nomi bilan atalgan “Epshteyn ro‘yxati” qanday hujjat?
Jeffri Epshteyn kim?
1953-yilda tug‘ilgan Jeffri 1971-yilda Nyu York universitetidagi matematika institutida o‘qiy boshlaydi. Biroq u tahsilni tugatmay institutni tashlab ketadi.
Bir necha yil turli kompaniyalarda ishlagan Jeffri 1981-yilda o‘zining konsalting kompaniyasini tashkil etadi. Gohida yutuqlar, gohida muvaffaqiyatsizliklar bilan ishlagan Jeffri 1990-yillarning birinchi yarmida taniqli tadbirkorga aylanadi.
Jefri tadbirkorlik faoliyatini davom ettirar ekan, 2000-yillarning o‘rtalarida unga nisbatan jinoyat ishi qo‘zg‘atiladi. Bunga 2005-yil mart oyida bir ayolning Florida shtatidagi Palm Bich shahri politsiyasiga bergan arizasi sabab bo‘ladi.
Ayol arizasida Jeffri Epshteynni jinsiy zo‘ravonlikda va balog‘atga yetmagan qizlarni zo‘rlaganlikda ayblagandi. Ya’ni Jeffri Epshteyn bir guruh yosh qizlar bilan birga ayolning 14 yoshli o‘gay qizini ham o‘zining villasiga olib borgan va o‘sha yerda zo‘rlagan.
Politsiya va Federal qidiruv byurosi (FQB) 11 oy davomida yashirin surishtiruv olib boradi va oxirida Epshteynning villasida tintuv o‘tkaziladi. Tintuv davomida politsiya Epshteyn villasidan voyaga yetmagan qizlarning suratlarini, ularning buyumlarini topadi.
So‘ng qizlarning shaxsi aniqlanadi va politsiya ulardan ko‘rsatma oladi. Ana shunda besh nafar qiz Epshteyn o‘zlarini zo‘rlaganini, so‘ng mehmonlariga tortiq qilganini aytib berishadi.
Shuningdek, politsiya Epshteynga tegishli villaning har bir burchagida kuzatuv kameralari o‘rnatganini aniqlaydi. Surishtiruvlarda tadbirkor taniqli shaxslarni villasiga taklif etib, ularga yosh qizlarni taqdim etgani va mehmonlarning yosh qizlar bilan sodir etgan intim munosabatlarini tasvirga tushirib, so‘ng ulardan shantaj maqsadida foydalangani aniqlanadi.
Oxir-oqibat 2006-yil avgustda Jeffri Epshteyn o‘z ayblarini tan oladi. Epshteynga nisbatan ochilgan jinoyat ishida ayblovning o‘zi 59 sahifa bo‘lib, unda tadbirkor 40 dan ortiq voyaga yetmagan qizni intim xizmatlar uchun taniqli shaxslarga qo‘shgani aytilgandi.
O‘shanda tadbirkorning barcha ayblari isbotlansa u umrbod qamoq jazosi olardi. Avvaliga barcha ayblovlarni rad etib turgan Epshteyn kamroq jazo olish maqsadida tergov organlari bilan kelishadi va faqat bir qizni, ariza bergan ayolning 14 yoshli o‘gay qizi bilan jinsiy aloqada bo‘lganini tan oladi.
Florida shtati prokurori buni tergov bilan hamkorlik deb talqin qiladi va Epshteynga nisbatan ilgari surilgan ayblovlarning qolganini bekor qiladi. O‘shanda Epshteyn bor yo‘g‘i 18 oyga qamoq jazosi oladi.
Tadbirkorni Palm Bichdagi qamoqxonaga joylashtirishadi. Biroq u haftasiga olti kun kunduzlari 12 soat o‘z ofisida ishlashga ruxsat oladi. Epshteyn qamoq deb atab ham bo‘lmaydigan “qamoq”da 13 oy o‘tirgach uni sinov muddati bilan ozod qilishadi. Shundan so‘ng u AQSHning boshqa hududlariga safar qilishi mumkin bo‘ladi.
O‘shanda Epshteynga kam jazo berilgani va tadbirkor muddatidan avval ozod qilingani ommaning noroziligiga sabab bo‘ladi. Keyinchalik ayrim nashrlar Epshteynga yengil jazo AQSH bosh prokurori Aleksandr Akosta tomonidan berilganini yozib chiqishadi.
2008-yilda Virjiniya shtatida yashovchi 18 yoshli qiz Epshteyndan 50 mln dollar undirib berish bo‘yicha sudga ariza beradi. Qiz arizasida 2004-2005-yillarda hali 14-15 yoshda bo‘lganida Epshteynni villasiga tadbirkorni massaj qildirish uchun kuch ishlatib olib borishganini, biroq Epshteyn uni zo‘rlab so‘ng qo‘liga 200 dollar berib uyidan chiqarib yuborganini ma’lum qilgandi.
AQSHdagi turli sudlarga 2015-yillargacha bunday mazmundagi arizalardan o‘nlab tushgan. Ularning ayrimlarini Epshteynning o‘zi jabrlanuvchilar bilan kelishib, yopgan. Biroq 2015-yilda bir qancha arizalar yopilmagan holda edi. Shu tariqa, Epshteynga qarshi da’volar jiddiylasha boradi.
Qamoqqa olish va shubhali o‘lim
2019-yil 21-fevralda AQSHning Florida shtati bo‘yicha okrug sudi Kennet Marra Epshteyn ishi bo‘yicha qaror chiqargan va tadbirkorga nisbatan ilgari surilgan ayblovlarni bekor qilgan prokurorlar qonuni buzganini aytib chiqadi. Ko‘p o‘tmay Epshteynni qamoqqa olish bo‘yicha order beriladi.
2019-yil 6-iyul kuni Epshteyni Nyu Jersidagi Teterboro aeroportida qo‘lga olishadi. O‘sha kunning o‘zida o‘nlab FQB xodimlari uning Manxettenda joylashgan uyida tintuv o‘tkazadi. Shunda u yerdan minglab yalang‘och holda rasmga tushirilgan ayollarning suratlari topiladi. Ayrim suratlarning orqasiga voyaga yetmagan qiz ekani yozib qo‘yilgandi.
Uydagi seyfdan 1987-yilda Epshteyn nomiga olingan Avstriya pasporti, yirik miqdorda naqd pullar, tilla taqinchoqlar topiladi. Pasportda uning yashash joyi Saudiya Arabistoni deb ko‘rsatilgandi.
Shuningdek, seyfdan bir qancha kompakt-disklar chiqadi va ularda voyaga yetmagan qizlar yalang‘och holda tushirilgan videolari bor edi. Disklar tepasiga “Young” (Yosh), “Misc nudes 1” (Yalang‘och qizlar) va “Girl pics nude” (Yalang‘och qizlar rasmlari) deb yozib qo‘yilgandi.
Oradan ikki kun o‘tgach Nyu York prokurori Jeffri Epshteynga nisbatan voyaga yetmaganlar bilan jinsiy aloqa qilish va qizlarni sotish bo‘yicha ayblov e’lon qiladi. Ayblovda Epshteyn 40 nafar qizni o‘z uyiga olib kelgani va turli mijozlarga intim xizmat ko‘rsatishga majburlagani aytilgandi.
2019-yil 9-avgust kuni qamoqxonadagi kameradan Jeffri Epshteyn bilan birga yotgan shaxsni olib chiqib ketishadi va tadbirkor yolg‘iz qoladi. 10-avgust kuni ertalab qo‘riqchilar Jeffri Epshteynni o‘zini osgan holda ko‘rishadi.
16-avgust kuni Nyu York sud-tibbiy ekspertizasi Jeffri Epshteyn o‘z joniga qasd qilganini ma’lum qiladi. Keyinchalik, har yarim soatda tadbirokrni kuzatib turishi kerak bo‘lgan qo‘riqchilar o‘z vazifasini bajarmagani ma’lum qilinadi va ular jazolanadi.
2019-yil 5-sentyabr kuni Jeffri Epshteyn Palm Bichdagi ota-onasi yotgan qabristonga dafn etiladi. Tadbirkordan jabrlangan qizlar tahqirlamasin deb Epshteyn yashirincha dafn etiladi va ota-onasining ism-shariflari ham olib tashlanadi.
Epshteynning xotini ham eriga sherik bo‘lgan
Jeffri Epshteyn vafot etganidan so‘ng ko‘p o‘tmay FQB uning xotini Gisleyn Maksvellni hibsga oladi. Bu ayol 1961-yilda Fransiyada tug‘ilgan va yoshligi Britaniyada o‘tgandi.
Gisleyning otasi Britaniyada bir nechta nashrlarga egalik qilardi. U 1991-yilda New York Daily News nashrini sotib olgach qizini doimiy yashash uchun Nyu Yorkga yuboradi. Ayol Jeffri Epshteyn bilan o‘sha davrda tanishadi. 1993-yilda ular oila quradi va birga yashay boshlaydi.
O‘z vaqtida bu oila AQSHning amaldagi prezidenti Donald Tramp, sobiq prezidenti Bill Klinton, taniqli advokat Alan Dershovis, Britaniya qirollik oilasi a’zosi shahzoda Endryu kabilar bilan yaqin do‘stona munosabatda bo‘lgan.
2008-yil Jeffri Epshteyn voyaga yetmagan qizlar bilan jinsiy aloqada va qizlarni taniqli shaxslarga majburlab sotganlikda ayblanib jazolangach Gisley eridan alohida yashay boshlaydi.
2015-yilda Epshteynga qarshi da’vo arizasi kiritgan qizlar va ayollarning bir nechtasi Gisleyn qizlarni tuzoqqa tushirish va taniqli shaxslarga pullashda eriga ko‘makchi bo‘lganini bildirishgan.
Ya’ni aksariyat yosh qizlarni Jeffri Epshteynga uning xotini Gisleyn tavsiya qilgan va ularni tanishtirgan. Ko‘pincha ayol qizlarga yaxshi pul to‘lanishini aytib, ularni tuzoqqa tushirgan. 2020-yilgacha sudlarga Gisleyn eriga sherik bo‘lgani haqidagi o‘nlab da’vo arizalari tushgandi. Biroq Gisleyn ayblarini tan olmaydi.
2016-yilda Gisleyn eri Epshteyn bilan ajrashadi va boshqa erkak bilan oila quradi.
2020-yil 2-iyul kuni Gisleyn Maksvell FQB xodimlari tomonidan Nyu Gempshir shtatidagi Bredford shahrida qo‘lga olinadi. Nyu York prokurori unga nisbatan oltita ayblov eʼlon qiladi.
Ular orasida, yolg‘on guvohlik berish va voyaga yetmaganlarni jinsiy foydalanish maqsadida sotish kabi ayblovlar bor edi. Ayblov xulosasiga ko‘ra, ayol 1994—1997-yillar oralig‘ida eri noqonuniy ish qilayotganini va o‘ljalar voyaga yetmagan qizlar ekanini bilgan holda erining jinoyatlariga sherik bo‘lgan.
Keyinchalik prokurorlar jinoyat ishiga Gisleyn 2001—2004-yillar oralig‘ida ham eri bilan sheriklikda jinoyat sodir etganini, bunda u asosan voyaga yetmagan qizlarni taniqli shaxslarga sotishdan avval ularni tayyorlash jarayonlarini boshqargani haqidagi ayblovlarni qo‘shishadi.
2021-yil 29-dekabr kuni AQSH federal sudi Gisleynni ayblovlarning beshta bandi bandi bo‘yicha aybdor deb topadi. Shundan so‘ng ayolning advokatlari appelyatsiya berishadi.
2022-yil Gisleyn Maksvell uzil-kesil 20 yil qamoq jazosiga hukm qilinadi. Undan keyin berilgan bir nechta appelyatsiya sudlar tomonidan rad etiladi.
Epshteyn mijozlari orasida Tramp ham bo‘lganmi?
Sud hujjatlariga ko‘ra, Epshteyn uyiga taniqli shaxslarni taklif etib, so‘ng o‘zi tutqunlikda ushlab kelgan qizlarni mehmonlarga intim xizmatlar ko‘rsatishga majburlagan. “Epshteyn ro‘yxati” degan atama tadbirkor xizmat ko‘rsatgan taniqli shaxslar ro‘yxatiga nisbatan aytiladi.
Epshteyn xizmat ko‘rsatgan odamlar orasida Tramp ham borligi aytiladi. Jumladan, 2016-yil aprelda Kaliforniyada yashovchi ayol Epshteyn va Trampga qarshi da’vo arizasi beradi.
Arizada ayol 1994-yilda 13 yoshligida Epshteyn uni Manxettendagi hashamatli uyiga olib borgani va o‘sha yerda Tramp va tadbirkor zo‘rlaganini ma’lum qiladi. Biroq 2016-yil may oyida federal sud da’vo arizasini rad etadi.
Biroq ayol jim ketmaydi va 2016-yil iyunda Nyu York sudiga yana bir da’vo arizasi kiritadi. Biroq oradan 3 oy o‘tgach negadir arizasini qaytarib oladi. O‘sha yili kuzgacha Tramp va Epshteynga qarshi bir nechta da’vo arizasi kiritiladi.
O‘sha paytda Tramp prezidentlikka nomzodini qo‘ygan, uning raqibi Hillari Klintonning yashirin pochtasi topilgach uning g‘alaba qozonishi aniq bo‘lib ulgurgandi. O‘shanda da’vo ariza kiritganlar noma’lum sabablarga ko‘ra arizalarini qaytarib olishadi. O‘shanda jabrlanuvchi ayollardan birining advokati mijoziga anonim tahdidlar bo‘lganini aytib chiqadi.
2019-yilda Jeffri Epshteyn shubhali tarzda halok bo‘ladi. Shundan so‘ng uning xotini eriga sherik bo‘lgan deb topiladi va 20 yil qamoq jazosi beriladi. 2020-yil Tramp prezidentlik saylovida Baydenga yutqazadi. O‘tgan yillar mobaynida uning Epshteynga mijoz bo‘lgani va voyaga yetmagan qizlar bilan jinsiy aloqada bo‘lgani haqida hech gap chiqmaydi.
2025-yil iyun oyi boshlarida AQSH prezidenti va uni 2024-yil kuzda bo‘lib o‘tgan saylovda qizg‘in qo‘llagan Ilon Mask o‘rtasida kelishmovchilik yuzaga keldi. Shunda Mask o‘ziga tegishli X ijtimoiy tarmog‘ida (sobiq Tvitterda) Epshteyn ishi bilan bog‘liq hujjatlarda Trampning ham nomi tilga olinganini yozdi.
“Haqiqiy bomba vaqti keldi: Donald Tramp Epshteyn fayllarida bor. Bu ularning ommaga oshkor etilmagani asl sababi. Xayrli kun, Tramp!”, deb yozgandi tadbirkor 5 iyun kuni. Biroq ma’lum vaqtdan keyin Mask bu gaplarni o‘chirib tashladi va uzr so‘radi.
Shundan so‘ng “Epshteyn ishi” yana kun tartibiga chiqdi va yetakchi nashrlar “Epshteyn ro‘yxati”ga va unda Tramp bor yo‘qligiga e’tibor qarata boshlashdi.
Maskning shovqin ko‘targan postidan so‘ng AQSH Adliya vazirligi Jeffri Epshteynning “mijozlar ro‘yxati”ni tuzganiga va nufuzli shaxslarni shantaj qilganiga va tadbirkorning qamoqda o‘ldirilganiga oid hech qanday dalillar yo‘q deb chiqdi.
Mask va Tramp o‘rtasidagi taranglik biroz yumshagan paytda to‘satdan The Wall Street Journal gazetasi Trampning Epshteynga mijoz bo‘lgani ehtimoli haqida maqola e’lon qildi.
Unda aytilishicha, 2003-yilda Tramp Epshteynning 50 yoshga to‘lishi munosabati bilan yalang‘och ayol surati tushirilgan maktub yo‘llagan. Maktubda “Tug‘ilgan kuningiz bilan va har bir kuningiz yana bir ajoyib sirga aylansin” so‘zlari yozilgan va ostiga “Donald” deb imzo qo‘yilgan.
Shundan so‘ng Tramp 2025-yil 18-iyul kuni AQSH The Wall Street Journal nashri va uning egalari ustidan Mayami federal sudiga 10 milliard dollarlik da’vo arizasi berdi.
Trampning da’vo arizasida mediamagnat Rupert Merdok, The Wall Street Journal nashri egasi Dow Jones agentligi, nashrning ikki nafar muxbiri, News Corp va uning bosh direktori Robert Tomson javobgar sifatida ko‘rsatilgan.
Da’vo arizasida aytilishicha, maktub soxta bo‘lgan va yuqoridagi shaxslar Trampga tuhmat qilib, katta moddiy va ma’naviy zarar yetkazgan.
Dow Jones agentligi Trampning da’vo arizasi haqidagi xabarga javoban: “Biz maqolalarimizning aniq va asosli ekaniga to‘liq ishonamiz va har qanday sud da’volaridan o‘zimizni qat’iy himoya qilamiz”, deb ta’kidladi.
Bugun ayrimlar Tramp ham Epshteyning mijozlari orasida bo‘lganiga ishonadi. Ular bunga dalil sifatida Tramp va Jeffri Epshteyn 2000-yillar boshlaridan yaqin tanish bo‘lganini aytishadi.
Shuningdek, ular Tramp 2024-yil kuzda o‘tkazilgan saylovdan avval va undan keyin bir necha bor “Epshteyn ishi”ga tegishli hujjatlarni maxfiylikdan chiqarib, ommaga oshkor qilishga va’da bergan bo‘lsa-da, bu va’dasini bajarmay kelyotganini aytishadi.
Joriy yil boshida Epshteyn ishiga doir bir qancha hujjatlar e’lon qilindi. Biroq ular oddiy ma’lumotlar bo‘lib, hali jamoatchilik so‘rayotgan hujjatlar ochiqlanmadi.
Xulosa o‘rnida. Bugun “Epshteyn ro‘yxati” haqidagi gap-so‘zlar tobora kuchayib bormoqda. Agar Tramp haqiqatdan ham o‘sha ro‘yxatda bo‘lsa hozircha prezidentlik vakolatidan foydalanib ayblovchilarning og‘zini yopa olar. Biroq prezidentlik muddati tugasa u bir paytlar voyaga yetmagan qizlar bilan jinsiy aloqada bo‘lgani uchun javob beradi.
G‘ayrat Yo‘ldosh tayyorladi.
Izoh (0)