Rossiya Federatsiyasi kengashining xalqaro ishlar qo‘mitasi raisi Konstantin Kosachev AQSH va Ukraina rasmiylari o‘rtasida kelishilgan o‘t ochishni to‘xtatish taklifiga izoh berib, har qanday kelishuv AQSH emas, Rossiya shartlari asosida bo‘lishini aytdi. Bu haqda Reuters xabar berdi.
11-mart kuni Saudiya Arabistonining Jidda shahridagi muzokaralarda AQSH Ukraina xavfsizligini qo‘llab-quvvatlashni davom ettirishini ma’lum qilgan. Bunga Ukraina AQSHning Rossiya bilan mojarosida 30 kunlik o‘t ochishni to‘xtatish taklifini qabul qilishi sabab bo‘lgan.
AQSH Davlat kotibi Marko Rubio AQSH endi taklifni Rossiya qabul qilishi kerakligi, vakolat Moskvada ekanligini aytgan.
“Umidimiz shuki, rossiyaliklar imkon qadar tezroq “ha” deb javob berishadi, shunda biz buning ikkinchi bosqichiga, ya’ni haqiqiy muzokaralarga o‘ta olamiz” , degan u.
Rubioning aytishicha, AQSH “imkon qadar tezroq” ham Rossiya, ham Ukraina bilan to‘liq kelishuvni xohlaydi.
“Har kuni bu urush davom etmoqda, odamlar halok bo‘lmoqda, bu mojarodan har ikki tomon ham zarar ko‘rmoqda”, dedi u.
Rossiya prezidenti Vladimir Putin tinchlik bitimini muhokama qilish uchun ochiqligini aytgan, biroq u va uning diplomatlari o‘t ochishni to‘xtatishga qarshi ekanliklarini va Rossiyaning “uzoq muddatli xavfsizligini” ta’minlaydigan kelishuvga erishishlarini bir necha bor ta’kidlagan.
Bundan tashqari, Putin Ukraina Rossiya da’vo qilgan va qisman nazorat qiladigan to‘rtta viloyatdan chiqib ketmaguncha urush davom etishini aytgan edi.
Konstantin Kosachev ham buni quyidagicha izohlagan:
“Rossiyaning Ukrainadagi pozitsiyasi yaxshilanmoqda, shu sababli endi vaziyat boshqacha bo‘ladi. Har qanday kelishuvlar, murosaga kelish zarurligini to‘la anglagan holda, Amerikaning emas, balki bizning shartlarimiz asosida bo‘lishi lozim. Bu g‘ururlanish emas, balki haqiqiy kelishuvlar hali ham jang maydonida yozilayotganini tushunishdir. Buni Amerika ham anglab yetishi lozim”.
Ma’lumot uchun, Saudiyada AQSH—Ukraina delegatsiyalari o‘rtasidagi uchrashuv 9 soat davom etdi. Yakunda Ukraina 30 kunlik o‘t ochishni to‘xtatish taklifini qabul qilgan.
Izoh (0)