“Amerika ovozi” xodimlari Tramp ma’muriyatini telekanal faoliyatini noqonuniy to‘xtatishda ayblab, Nyu Yorkdagi federal sudga da’vo arizasi kiritdi. Ular Oq uyning tegishli qarori bekor qilinishini so‘rashmoqda. Jurnalistlarning fikricha, mazkur telekanal o‘nlab yillar davomida dunyoning turli mamlakatlariga, xususan, erkin matbuot mavjud bo‘lmagan davlatlarga AQSH haqida xabar yetkazib kelgan.
Da’vo arizasi “Amerika ovozi” jurnalistlari, Chegara bilmas muxbirlar tashkiloti va bir nechta kasaba uyushmalari tomonidan AQSH Global Media agentligi va Trampning tashkilot bo‘yicha maslahatchisi Kari Leykka qarshi kiritilgan. U telekanalni “chirigan tizim” deb atab, to‘liq isloh qilishga chaqirgandi.
Hujjatda “dunyoning ko‘plab mintaqalariga obyektiv axborot yetkazib beruvchi muhim manba yo‘qolgani hamda bu bo‘shliqni avtoritar davlatlarning senzura ostidagi ommaviy axborot vositalari to‘ldirishi” qayd etilgan.
“Amerika ovozi” Ikkinchi jahon urushi davrida tashkil etilgan bo‘lib, asosan avtoritar mamlakatlarga muqobil axborot uzatishga ixtisoslashgan edi. Biroq Kongress tomonidan moliyalashtirib kelingan telekanal Donald Trampning davlat xarajatlarini qisqartirish bo‘yicha siyosati nishoniga tushdi.
Izoh (0)