Isroil hukumati G‘azo sektori aholisini “ixtiyoriy ravishda” ko‘chirish bilan shug‘ullanadigan boshqarma tuzdi. Isroil bosh vaziri devoni maslahatchisi Dmitriy Gendelman ma’lumotni tasdiqladi. Bu haqda The Times of Israel xabar berdi.
Tashabbusni Isroil harbiy-siyosiy kabineti 22-mart kuni bo‘lib o‘tgan yig‘ilishda ma’qullagan. Yangi boshqarma Mudofaa vazirligi huzurida faoliyat yuritadi. U falastinliklarning uchinchi davlatlarga chiqishini muvofiqlashtiradi. Boshqarma quyidagilar bilan shug‘ullanadi:
- G‘azo aholisining xavfsiz va nazorat ostida chiqib ketishini tashkil etish,
- harakatlanish vaqtida xavfsizlikni ta’minlash,
- yo‘nalishlarni belgilash,
- chegaralarda tekshirish,
- quruqlik, dengiz va havo orqali harakatlanish uchun infratuzilmani yaratish.
Falastinliklarni o‘z yurtidan ko‘chirish taklifini ilk bor AQSH prezidenti Donald Tramp ilgari surgan edi. U Qo‘shma Shtatlar G‘azo sektorini “o‘z nazoratiga olishini” aytib, Misr, Iordaniya va boshqa mamlakatlarni ko‘proq falastinlik qochqinlarni qabul qilishga chaqirgan.
Keyinchalik Birlashgan Millatlar Tashkiloti Trampning G‘azo sektorida yashovchi falastinliklarni ko‘chirish rejasi xalqaro huquqni buzayotganini ma’lum qilgan. Isroil esa AQSH prezidentining taklifini qo‘llab-quvvatlagan. Tramp Isroil o‘z hududini G‘arbiy Sohil va Falastin hisobiga kengaytirishiga shama qilgan. U Isroil mintaqa davlatlariga nisbatan go‘yoki juda kichikligini aytib, “bu yaxshi emasligini” ta’kidlagan.
G‘azoni sotib olish va unga egalik qilishga qaror qildim. Qayta tiklash masalasiga kelsak, biz uni Yaqin Sharqdagi boshqa davlatlarga topshirishimiz mumkin, ular alohida qismlarni qayta qurishlari uchun yoki boshqalar bizning homiyligimiz ostida buni amalga oshirishi mumkin, degandi AQSH prezidenti.
U HAMASning hududga qaytishiga yo‘l qo‘ymaslik uchun AQSH G‘azo sektorini o‘z nazoratida saqlab turishga majburligini ta’kidlagan. Arab davlatlari esa Trampning rejasini qoralagandi.
Izoh (0)