AQSH prezidenti Donald Tramp va Rossiya prezidenti Vladimir Putin 18-mart kuni telefon orqali suhbatlashdi. Bu Trampning prezidentlikka kirishidan so‘ng, Ukrainadagi urushni to‘xtatish bo‘yicha rejasini amalga oshirishni boshlaganidan keyingi ikkinchi muloqotdir.
Suhbatga Kremlning munosabati
Kreml ma’lumotlariga ko‘ra, siyosatchilar “Ukraina atrofidagi vaziyat bo‘yicha batafsil va ochiq fikr almashishni davom ettirgan” va mojaroni hal qilish bo‘yicha sa’y-harakatlarni davom ettirish niyatini tasdiqlagan.
Putin Trampga Ukrainadagi vaziyatni hal qilish yo‘llarini birgalikda ishlab chiqishga tayyorligini aytgan. Shuningdek, AQSH prezidentining Rossiya va Ukrainaning energetika infratuzilmasiga 30 kun davomida zarba berishdan o‘zaro voz kechish g‘oyasini qo‘llab-quvvatlagan va harbiylarga shunday buyruq bergan.
AQSH prezidentining 30 kunlik tinchlik o‘rnatish tashabbusi doirasida Rossiya tomoni bir qator muhim masalalarni ko‘rsatib o‘tgan. Bular jangovar to‘qnashuv chizig‘i bo‘ylab ehtimoliy o‘t ochishni to‘xtatishni samarali nazorat qilishni ta’minlash, Ukrainada majburiy safarbarlikni to‘xtatish va Ukraina Qurolli Kuchlarini qayta qurollantirish zaruriyati bilan bog‘liq, deyiladi bayonotda.
Shuningdek, Putin amerikalik hamkasbiga 19-mart kuni 175 nafar asir 175 kishiga almashtirilishi haqida ma’lum qilgan.
Kreml bayonotida aytilishicha, tomonlar “Ukrainadagi kelishuvga erishish bo‘yicha sa’y-harakatlarni davom ettirishga” va shu maqsadda Rossiya va Amerika ekspert guruhlarini tuzishga kelishib olgan.
Oq uy bayonoti
Oq uy bayonoti ancha qisqaroq bo‘ldi. Garchi suhbat davomida AQSH prezidentining rasmiy vakili Den Skavino uning “yaxshi ketayotganini” ta’kidlagan bo‘lsa-da, Oq uyning yakuniy bayonotida Ukrainadagi urushga faqat ikkita abzats munosabat berildi.
Ulardan birida quyidagi gaplar keltirilgan:
Liderlar tinchlikka erishish harakatlari energiya va infratuzilma sohalarida o‘t ochishni to‘xtatish, shuningdek, Qora dengizda o‘t ochishni to‘xtatish va doimiy tinchlikka erishish uchun texnik muzokaralar o‘tkazishdan boshlanishiga kelishib oldi. Ushbu muzokaralar darhol Yaqin Sharqda boshlanadi.
Shuningdek, Tramp va Putin “strategik qurollarni tarqatishni to‘xtatish zaruriyati”, Yaqin Sharqni “kelajakdagi mojaroning oldini olish uchun potentsial hamkorlik mintaqasi” sifatida va “Isroilni yo‘q qilish imkoniyatiga ega bo‘lmasligi kerak bo‘lgan” Eronni muhokama qilgan.
Biroz vaqt o‘tgach, Donald Tramp o‘zining Truth Social ijtimoiy tarmog‘ida Putin bilan aloqalarini yana “juda yaxshi va samarali” deb ta’rifladi. Uning fikricha, u Putin bilan energetika obektlariga darhol o‘t ochishni to‘xtatish haqida kelishib olgan.
Zelenskiy qanday munosabat bildirdi?
Putin va Tramp o‘rtasidagi suhbatdan bir necha soat o‘tgach, Ukraina prezidenti Vladimir Zelenskiy Amerika tomonidan suhbat tafsilotlarini kutayotganini ma’lum qildi.
U Rossiya energetika infratuzilmasiga zarba berishni to‘xtatish taklifini qo‘llab-quvvatlashini (Rossiya tomonidan ko‘zgudagi qadam evaziga), biroq AQSH va Rossiya yetakchilarining muzokaralari haqida ko‘proq ma’lumot olishni istashini aytdi.
Menimcha, agar biz prezident Tramp bilan suhbatlashsak va o‘shanda rossiyaliklar amerikaliklarga nima taklif qilganini yoki amerikaliklar rossiyaliklarga nima taklif qilganini batafsil bilib olsak, to‘g‘ri bo‘ladi, dedi Zelenskiy.
Keyinroq Ukraina rahbari Putinning bayonotlariga qaramay, Rossiya fuqarolik infratuzilmasiga hujum qilishda davom etayotganini aytdi.
Bugun Putin amalda o‘t ochishni to‘liq to‘xtatish taklifini rad etdi. Dunyo bunga javoban Putinning urushni cho‘zishga bo‘lgan har qanday urinishlarini rad etishi to‘g‘ri bo‘lardi, dedi u.
Ikki prezidentning suhbati taxminan bir yarim soat davom etdi. Putin bilan suhbat arafasida AQSH prezidenti Air Force One bortida jurnalistlarga Rossiya prezidenti bilan suhbatda hududlar masalasini va Rossiya hamda Ukraina o‘rtasida “muayyan aktivlarni taqsimlash”ni muhokama qilishni rejalashtirayotganini aytgandi.
Yer haqida gaplashamiz. Biz elektr stansiyalari haqida gaplashamiz, degan edi u.
Oq uy matbuot kotibi ham Putin bilan suhbatda Zaporojye AES atrofidagi vaziyatni muhokama qilish rejalashtirilganini tasdiqlagan. Biroz vaqt o‘tgach, Tramp o‘zining Truth Social ijtimoiy tarmog‘ida Rossiya rahbari bilan Ukraina bo‘yicha tinchlik kelishuvining ko‘plab elementlari kelishilganini ta’kidlab, “hali qilinadigan ishlar ko‘p”ligini aytgandi.
Izoh (0)