Global Firepower tashkilotining 2025-yilgi hisobotiga ko‘ra, O‘zbekiston mudofaa byudjeti bo‘yicha Markaziy Osiyo davlatlari orasida birinchi o‘rinni egallab, 2,8 milliard AQSH dollarini tashkil etmoqda.
Undan keyingi o‘rinlarni Qozog‘iston (2 milliard AQSH dollari) va Turkmaniston (1,1 milliard AQSH dollari) mudofaa xarajatlari bilan egallagan. Eng kam mudofaa xarajatlari Qirg‘izistonda (221,8 million AQSH dollari) va Tojikistonda (446 million AQSH dollari) kuzatilmoqda.
Xalqaro strategik tadqiqotlar instituti (IISS) ma’lumotlariga ko‘ra, jahon mudofaa xarajatlari bir yil ichida 2023-yildagi 2,24 trillion AQSH dollaridan 2024-yilda 2,46 trillion AQSH dollarigacha oshgan.
Dunyodagi eng yirik o‘n beshta mudofaa byudjeti 2 trillion AQSH dollaridan sal kamroq mablag‘ni jamlaydi, shundan 968 milliard AQSH dollari, deyarli yarmi, faqat AQSH hisobiga to‘g‘ri keladi.
Qolgan o‘n to‘rtta davlatning umumiy mudofaa byudjeti 1 trillion AQSH dollaridan sal ko‘proqni tashkil etadi.
Harbiy xarajatlar bo‘yicha ikkinchi o‘rinni Xitoy (235 milliard AQSH dollari), uchinchi o‘rinni esa Rossiya (145,9 milliard AQSH dollari) egallaydi. Biroq xarid qobiliyati paritetini hisobga olgan holda, Xitoyning tuzatilgan mudofaa budjeti 477 milliard AQSH dollarini, Rossiyaniki esa 461 milliard AQSH dollarini tashkil etadi.
Izoh (0)