AQSH prezidenti Donald Tramp 13-mart kuni Rossiya prezidenti Vladimir Putin bilan telefon orqali suhbatlashganini ma’lum qildi. Bu haqda u o‘zining Truth Social ijtimoiy tarmog‘ida xabar berdi.
Siyosatchi Rossiya rahbari bilan bo‘lgan muloqotni “yaxshi va samarali” deb ta’rifladi. Uning aytishicha, Ukrainadagi mojaroni to‘xtatish imkoniyatlari mavjud.
“Kecha biz Rossiya prezidenti Vladimir Putin bilan juda yaxshi va samarali muzokaralar o‘tkazdik. Bu dahshatli va qonli urush tugashi uchun juda yaxshi imkoniyatlar bor. Hozirda minglab ukrainalik askarlar rossiyalik qo‘shinlar tomonidan to‘liq qurshovga olingan va juda yomon hamda himoyasiz holatda turishibdi.
Men prezident Putindan ularning hayotini saqlab qolishini so‘radim. Bu Ikkinchi jahon urushidan beri ko‘rilmagan dahshatli qirg‘in bo‘ladi. Xudo ularning barchasini asrasin!”, deb yozdi AQSH prezidenti Truth Social ijtimoiy tarmog‘idagi sahifasida.
Kreml esa telefon suhbati bo‘lib o‘tganligini hozircha tasdiqlamagan.
Izoh (0)