STEM va biznes yo‘nalishidagi qizlar uchun TBC Bank’dan ta’lim grantlari — O‘zbekistonda gender tafovutini kamaytirish yo‘lida yangi qadam

TBC Bank “Kasb jins tanlamaydi” nomli grant dasturini yo‘lga qo‘ydi va ushbu tashabbus doirasida hamkor xususiy oliy ta’lim muassasalarida o‘qishni boshlayotgan yetti nafar talaba qizning birinchi kursdagi kontrakt to‘lovini to‘liq qoplaydi.  Dasturning maqsadi — O‘zbekistonda ayollar ishtiroki yetarlicha bo‘lmagan fan, texnologiya, muhandislik, matematika (STEM) va tadbirkorlik sohalarida ularning faolligini oshirishdir.

Global Gender Gap Report 2025 ma’lumotlariga ko‘ra, O‘zbekistonda oliy ta’lim olayotgan talabalarning 54,3 foizdan ortig‘ini qizlar tashkil etsa-da, STEM yo‘nalishlarida ularning ulushi atigi 17,5 foizga teng. Axborot-kommunikatsiya texnologiyalari sohasida tahsil olayotgan talabalar orasida qizlar bor-yo‘g‘i 3 foizni, tabiiy fanlar, matematika va statistika sohasida — 5 foizni, muhandislik, ishlab chiqarish va qurilish yo‘nalishlarida esa — 8 foizni tashkil etadi. Bu — gender tengsizligining yaqqol ko‘rinishi bo‘lib, biznes va mamlakat salohiyatini cheklaydi. Muammoni hal etishni kechiktirmaslik zarur, chunki har bir boy berilgan yil — kelajakning yana bir necha yilga orqaga surilishi demakdir.

“Kelajakda iqtidorli qizlar jamiyat hayotini o‘zgartiradigan innovatsiyalar yaratishi uchun biz bugun ta’limga investitsiya kiritmoqdamiz. TBC ekotizimi jamoasida ayollar ulushi 35 foizni tashkil etadi va bu ko‘rsatkich ortib borishi kerak. Amaliy tajriba shuni ko‘rsatadiki, gender xilma-xilligi innovatsiyalar hamda biznes samaradorligiga bevosita ta’sir ko‘rsatadi,” — deya ta’kidladi TBC Uzbekistan marketing bo‘yicha direktori Nodira Sultonxo‘jayeva.

Nega gender muvozanati muhim va u kompaniyalar hamda iqtisodiyotga nima beradi? Bunga bir nechta sabab bor:

• Jinsi jihatdan aralash jamoalar turli g‘oyalarni ilgari suradi va inqirozlarni yengib o‘tishda samaraliroq bo‘ladi. Bu esa ish sifati va tezligiga ijobiy ta’sir qiladi;
• Ayollar — jamiyat va xaridorlarning yarmini tashkil etadi. Mahsulot va xizmatlar yaratishda ayollarning tajribasi hamda ehtiyojlari inobatga olinsa, ular tezroq ommalashadi va muvaffaqiyat qozonadi;
• Yuqori samaradorlikka ega sohalarda ayollar bandligining ortishi oilalarning daromadlarini oshiradi va davlatning soliq bazasini kengaytiradi.

“Kasb jins tanlamaydi” loyihasi doirasida TBC Bank American University of Technologies, IT Park University, Amity University in Tashkent va TEAM University oliygohlarida bakalavriat yoki tayyorlov kursi (Foundation Year) dasturining birinchi o‘quv yili uchun kontrakt to‘lovini to‘liq qoplaydi.

Grant dasturida ishtirok etish uchun arizalar 2025-yil 13-avgustga qadar qabul qilinadi. Ishtirokchilar to‘rtta hamkor universitetlardan birini tanlab, unga hujjatlarini va grant arizasini topshirishlari mumkin. Sentabr oyida TBC Bank, Raqamli texnologiyalar vazirligi, UN Women, Women in Tech va boshqa kompaniyalar vakillaridan iborat tanlov hay’ati yetti nafar g‘olibani aniqlaydi.

Tanlov haqida batafsil: havolada

Reklama huquqi asosida