AQSH prezidenti Donald Tramp ma’muriyati Ukrainadagi urushni ikki xil bosqichda tugatmoqchi. Bu haqda davlat kotibi Marko Rubio CBS News telekanaliga bergan intervyusida ma’lum qildi.
Ma’lumotlarga ko‘ra, Ukraina o‘z hududlaridan voz kechishi evaziga xavfsizlik kafolatlarini olishi mumkin bo‘ladi.
A reja — o‘t ochishni to‘xtatish, shundan so‘ng B rejaga, ya’ni urushni uzoq muddatga to‘xtatish bo‘yicha muzokaralarning ikkinchi bosqichiga o‘tishimiz mumkin, dedi Rubio.
U gap bevosita muloqot emas, balki “vositachilik diplomatiyasi” haqida ketishi mumkinligini aytdi. Ushbu bosqichning maqsadi barqaror va barcha tomonlarning ehtiyojlarini hisobga oladigan yechimni topishdir.
Rubioning so‘zlariga ko‘ra, muzokaralarning ikkinchi bosqichi juda murakkab bo‘ladi, biroq birinchi bosqichsiz bu amalga oshishi imkonsiz.
Tomonlar bir-birini o‘qqa tutishda davom etayotgan bo‘lsa, uzoq muddatli tinchlik haqida kelishib olish qiyin. Shuning uchun prezident (Donald Tramp) o‘t ochishni to‘xtatishga erishishga intilmoqda. Agar biz bunga erishsak, ikkinchi bosqichga — uzoq muddatli yechimni ishlab chiqishga o‘tamiz. Bu murakkab bo‘ladi, ikkala tomondan ham ko‘p mehnat va murosa talab etadi, lekin bu zarur. Urush abadiy davom etishi mumkin emas, deya ta’kidladi Rubio.
Shuningdek, u uch yildan beri davom etayotgan urushning nihoyatda murakkab ekanini va oson yechim yo‘qligini aytdi.
Marko Rubio, shuningdek, maxsus vakil Stiv Uitkoffning Rossiya prezidenti Vladimir Putin bilan yaqinda bo‘lib o‘tgan uchrashuviga izoh berdi. Uning so‘zlariga ko‘ra, uchrashuv “istiqbolli va umidli” bo‘lgan. Ammo u bu haqda ochiq muhokama qilmasligini ham aytib o‘tdi.
Izoh (0)