Fransiya prezidenti Emmanuel Makron Yevropa ittifoqining Bryusseldagi sammitining birinchi kunidan so‘ng 27-mart kuni Parijda bir necha davlat rahbarlari uchrashib, Ukraina atrofidagi vaziyatni muhokama qilishini ma’lum qildi.
“Biz Ukraina armiyasini qisqa muddatli qo‘llab-quvvatlash va Rossiya bosqinlarining oldini olish uchun Ukraina armiyasining barqaror hamda mustahkam modelini himoya qilish bo‘yicha ishimizni yakunlaymiz”, dedi Fransiya prezidenti.
Uning qo‘shimcha qilishicha, 27-mart kuni Ukrainani qisqa muddatli qo‘llab-quvvatlash bo‘yicha yanada aniqroq kelishuvlarga erishish maqsad qilingan.
“Kelasi hafta biz Parijda Ukrainaga yordam berishga tayyor davlatlar koalitsiyasining sammitini o‘tkazamiz”, dedi Makron.
Uning ta’kidlashicha, sammitda Ukraina prezidenti Vladimir Zelenskiy ham ishtirok etadi.
Bloomberg ma’lumotlariga ko‘ra, Germaniya, Fransiya va Polsha kabi Yevropa ittifoqining yetakchi davlatlari, shuningdek, Kanada va Buyuk Britaniya (a’zo bo‘lmagan davlatlar) kelgusi hafta Parijda yangi sammit o‘tkazadi. Ushbu davlatlar 20-mart kuni Bryusseldagi sammitda boshlangan muhokamalarni davom ettiradi.
Kun tartibida AQSH va Rossiya o‘rtasidagi Ukraina bo‘yicha muzokaralarga ta’sir o‘tkazish imkoniyatlari va eng samarali tarzda ularda ishtirok etish yo‘llarini ko‘rib chiqish masalalari bor.
Izoh (0)