AQSH prezidenti Donald Tramp Rossiya va Ukraina o‘rtasidagi urushning yanada avj olishini to‘xtatish bo‘yicha sa’y-harakatlar “nazorat ostida” ekanini aytdi. Bu haqda u Outkick portali jurnalisti Kley Trevisga bergan intervyusida ma’lum qildi.
Tramp rossiyalik hamkasbi Vladimir Putin va Ukraina prezidenti Vladimir Zelenskiy bilan “yaxshi” munosabatlari urushni to‘xtatish bo‘yicha muzokaralarda muhim ekanini ta’kidladi.
Bu urushni to‘xtatish imkoniyatiga ega bo‘lsak ajoyib bo‘lardi. Shuni aytamanki, mendan boshqa hech kim buni uddalay olmaydi. Hech kim, dedi AQSH rahbari.
Tramp Putinni “juda yaxshi” bilishini yana bir bor ta’kidladi va u prezidentligi davrida Rossiya rahbari hech qayerga bostirib kirmaganini eslatdi.
Putin men prezident bo‘lganimda hech qayerga bostirib kirmagan. U Bush va Obama prezidentligi davrida Qrimni oldi, Gruziyani oldi, u hammasini olishga harakat qilmoqda...Dunyoda uni to‘xtata oladigan mendan boshqa odam yo‘q deb o‘ylayman va men uni to‘xtata olishimga umid qilaman. Biz juda oqilona muzokaralar olib bordik. Men shunchaki odamlar halok bo‘lishini to‘xtatishni istayman. Ular har hafta 2500 nafar yosh bolani yo‘qotmoqda, bular ham ruslar, ham ukrainlardir, dedi u.
Tramp o‘tgan haftada avval Putin, keyin esa Zelenskiy bilan telefon orqali muloqot qildi. Tramp bilan suhbat chog‘ida Putin 30 kunlik sulh davomida Ukrainaning energetika infratuzilmasiga zarba berishni to‘xtatishga rozi bo‘ldi, biroq amerikaliklarning o‘t ochishni to‘liq to‘xtatish haqidagi taklifini rad etdi. Zelenskiy, o‘z navbatida, energetika obyektlariga zarbalarni o‘zaro to‘xtatishga rozi bo‘ldi. Shu bilan birga, u Kiyev rossiyaliklarning zarbalariga munosib javob berishini ta’kidladi.
Izoh (0)