Mudofaa vazirligi harbiy xizmatchilari AQSHda bo‘lib o‘tgan “Eng ilg‘or jangchi-2025” musobaqasida g‘olib bo‘ldi, deb xabar bermoqda vazirlik matbuot xizmati.
-irJelzRH.avif)
Ma’lum qilinishicha, 17–20-mart kunlari AQSHning Missisipi shtati Camp Shelby harbiy-o‘quv bazasida bo‘lib o‘tgan musobaqada O‘zbekiston Mudofaa vazirligi harbiy xizmatchilari — kichik serjant Abdullayev Alishox va III-darajali serjant Jovkashev Shohrux ishtirok etdi.
Xalqaro harbiy hamkorlik aloqalarini mustahkamlash va maxsus bo‘linmalarda xizmat qilish nufuzini oshirish kabi maqsadlarda tashkil etilgan musobaqada harbiy xizmatchilar AQSH Milliy gvardiyasining maxsus bo‘linmalari harbiy xizmatchilari bilan kuch sinashdi.
-7tTCzIyB.avif)
Musobaqa davomida harbiy xizmatchilar yakka tarkibda jismoniy tayyorgarlik sinovlari (6 ta mashqni o‘z ichiga olgan Fitnes test), jismoniy va ruhiy zo‘riqish yo‘lagidan o‘tish, tunda 15 kilometr masofaga oriyentirlash, 15 kilogramm yuk bilan 20 kilometr masofaga marsh yugurish, jangovar va umumiy tayyorgarlik bo‘yicha test sinovlari, insho yozish (harbiy hamkorlik mavzusida 500 tadan kam bo‘lmagan so‘z), artilleriya olovini boshqarish, AQSH namunasidagi o‘qotar qurollarni noto‘liq qismlarga yoyish, yig‘ish va jangovar holatga keltirish, shuningdek, ulardan turli usul va sharoitlarda o‘q otish, tibbiy tayyorgarlik, ommaviy qirg‘in qurollaridan himoyalanish, kutilmagan (syurpriz) mashqlar kabi shartlarni muvaffaqiyatli bajardi.
O‘zbekistonlik harbiy xizmatchilar jamoaviy bahs — 15 kilogramm yuk bilan 20 kilometr masofaga marsh yugurish shartini 1 soat 50 daqiqa ichida bajardi. Shuningdek, yakka tartibdagi bahslarda III-darajali serjant Jovkashev Shohrux 3 kilometr 219 metr masofani 11 minut 18 soniyada bosib o‘tgan bo‘lsa, kichik serjant Abdullayev Alishox 250 metr masofaga yugurish davomida majmuaviy mashqlarni 1 daqiqa 18 soniyada bajarib, 5 kilogramm og‘irlikdagi koptokni 12,3 metr masofaga uloqtirgan. Mazkur shartlarning barchasida harbiy xizmatchilar musobaqa rekordini yangiladi.
G‘olib harbiy xizmatchilar musobaqaning maxsus sovrini bilan taqdirlandi. Ular 23-mart kuni Toshkentda tantanali ravishda kutib olindi.
Vazirlik matbuot xizmatining qayd etishicha, mazkur musobaqada o‘zbekistonlik harbiy xizmatchilar 2019-yildan beri muvaffaqiyatli qatnashib, har birida ishtirokchilardan mutlaq ustunlik bilan g‘oliblikni qo‘lga kiritib keladi.
Izoh (0)