Eron qanotli va ballistik raketalar zaxiralari saqlanadigan yerosti harbiy bazasini namoyish qildi. Bu haqda Tehran Times xabar berdi.
Kadrlar Islom inqilobi qo‘riqchilari korpusi (IIQK) aerokosmik kuchlarining raketa bo‘linmasidan olingan. Unda Kheibar Shekan, Sejjil, Emad, Haj Qasem, Paveh, Ghadr-H va boshqa raketalar tasvirlangan. Ushbu bazadan 2024-yilning oktyabr oyida birinchi marta Isroilga 200 ga yaqin raketa, jumladan, gipertovushli raketalar bilan hujum qilish uchun foydalanilgani aytilmoqda. O‘shanda Isroil bunga javoban Eron ichidagi harbiy obyektlarni nishonga olgandi.
Videoda Eron Qurolli kuchlari shtab boshlig‘i general-mayor Muhammad Bageri va IIQK havo-kosmik kuchlari qo‘mondoni brigada generali Amir Ali Hojizoda harbiy yo‘ltanlamas transport vositasida tunnel bo‘ylab joylashgan raketa stellajlari va yuk mashinalariga o‘rnatilgan uchirish moslamalari yonidan o‘tayotganini ko‘rish mumkin.
Eronning yerosti bazalari videosi AQSH prezidenti Donald Trampning tahdidlari fonida e’lon qilindi. U Tehronga yangi yadroviy kelishuvga erishish uchun ikki oy muhlat bergan edi. 2018-yilda Tramp sobiq prezident Barak Obama imzolagan yadroviy qurol bo‘yicha oldingi kelishuvdan chiqqan.
Yanvar oyida IIQK ikkita yerosti harbiy bazasi haqida xabar bergan edi, ulardan biri dengiz floti ehtiyojlarini qondiradi. Bundan tashqari, 4 ming kilometrgacha bo‘lgan masofaga 13 tagacha jangovar zaryadlarni olib yurishga qodir bo‘lgan “G‘azo” o‘ta og‘ir droni taqdim etilgan.
Izoh (0)