Saudiya Arabistonida AQSH bilan o‘tkazilayotgan muzokaralarda Rossiya delegatsiyasi Ukrainaning to‘rt viloyati — Donetsk, Lugansk, Zaporojye va Xerson hududlarining barchasini o‘z nazoratiga olishga intilmoqda. Bu haqda manbalarga tayanib, The Moscow Times xabar berdi.
Garchi bu hududlarning birortasi ham Rossiya armiyasi tomonidan to‘liq nazorat qilinmayotgan bo‘lsa-da, Kreml ularni ma’muriy chegaralari bo‘yicha — Rossiya konstitutsiyasida mustahkamlangan anneksiyaga muvofiq qo‘lga kiritishni rejalashtirmoqda.
Kremlga yaqin amaldor prezident Vladimir Putin siyosiy jihatdan bu hududlarni yo‘qotishga yo‘l qo‘ya olmasligini aytdi. U Rossiya har qanday yo‘l bilan ular ustidan nazoratni o‘rnatishga intilayotganini ta’kidladi.
Konstitutsiyada hududlarning Rossiya tarkibidan chiqish mexanizmi yo‘q. Bizga Zaporojye va Xerson viloyatining butun hududi kerak, dedi u.
Rossiyalik boshqa bir amaldor esa AQSH Ukrainaga Rossiya tomonidan bosib olingan hududlardan qo‘shinlarni butunlay olib chiqish talabini qo‘yib, bosim o‘tkazishiga umid qilmoqda.
Yoki Tramp qo‘shinlarini olib chiqish uchun ta’sir o‘tkazadi, yoki bizga “Uzoq muddatli muzokaralarga kirishing, parallel ravishda harbiy kuchdan foydalanib, nazoratni o‘rnating” deydi. Bu biz uchun eng yomon variant, chunki daryolarni o‘zgartirish — doimiy og‘riqli jarayon, deya tushuntirdi amaldor.
Muqobil variant sifatida Rossiya Ukrainaning boshqa viloyatining bir qismini, masalan, Dnepropetrovsk yoki Sumi viloyatini egallab olishga harakat qilishi, keyin esa Xerson va Zaporojyega almashishni taklif qilishi mumkin.
Biz Dneprni kechib o‘tish va Xersonga hujum qilish kerak bo‘lmaydigan variantni topishga umid qilamiz. Bungacha yetib bormasligimiz kerak. Bu biz uchun minglab yo‘qotishlarni anglatadi, deydi yana bir suhbatdosh.
Fevral oyi holatiga ko‘ra, Rossiya armiyasi Lugansk viloyatining 98,6 foizini, Donetsk viloyatining 62,6 foizini, Zaporojye viloyatining 71,9 foizini va Xerson viloyatining 69,3 foizini nazorat ostida ushlab turdi. Bundan tashqari, so‘nggi ikki viloyatda harbiylar markazlarni nazorat qilmayapti.
Bu hududlarni harbiy yo‘l bilan egallashga Rossiya tezda qodir emas. Rossiyaliklar uchun hatto bir nechta qishloqni bosib olishning o‘zi katta yutuq. Dneprni kechib o‘tib, Xersonni olish yoki hatto ikki qirg‘oqda joylashgan Zaporojye shahrini egallash uchun favqulodda hodisa yuz berishi kerak. Bu o‘ta qiyin vazifa. Yoki Rossiya armiyasi keskin kuchaytirilishi kerak, bu to‘satdan yoki yo‘q joydan sodir bo‘lmaydi, yoki Ukraina mudofaasi butunlay qulashi lozim, deydi isroillik harbiy ekspert David Sharp.
Moskvadagilar Donald Trampning ma’muriyati uchun Rossiyaga qaysi hududlar o‘tishi ahamiyatli emasligiga umid qilmoqda.
Menimcha, Tramp zamonaviy, yaxshi qurollangan, g‘arbparast Ukrainani ko‘rishni xohlaydi. U (Tramp) Ukrainani to‘liq bermoqchi emas. Ammo chegaraning qayerdan o‘tkazilishi uning uchun muhim emas, deydi rossiyalik diplomatlardan biri.
Izoh (0)