AQSHning 46-prezidenti Jo Bayden ma’muriyati AQSH va Rossiya munosabatlarining bu qadar izdan chiqishida aybdor. Bu haqda AQSH prezidenti Donald Tramp Truth Social tarmog‘ida ma’lum qildi.
“Hiylakor Jo Bayden bizni Rossiya bilan haqiqiy chalkashlikka (va boshqa barcha narsalarga) tortib kiritdi, lekin men bizni bundan olib chiqmoqchiman.
Uning xatosi sabab millionlab odamlar behuda halok bo‘ldi, ularni endi hech qachon ko‘rmaymiz <...> va agar biz o‘t ochishni to‘xtatishga erishmasak va Rossiya bilan yakuniy kelishuvlarni imzolashni ta’minlamasak, qurbonlar soni ortishda davom etadi”, degan Amerika yetakchisi.
Shuningdek, Tramp agar o‘sha davrda prezident bo‘lganida urush bo‘lmasligini, rekord darajadagi inflyatsiya boshdan kechirilmasligini ta’kidlagan.
“Agar men prezident bo‘lganimda urush bo‘lmasdi. Bu 100 foiz sodir bo‘lmasdi. Xuddi shunday, Isroilda 7-oktyabr voqealari yuz bermasdi, Afg‘onistondan qo‘shinlarni olib chiqish kuch va g‘urur bilan amalga oshirilgan bo‘lardi va bu mamlakatimiz tarixidagi eng sharmandali kun emas, balki shon-sharaf lahzasi bo‘lishi mumkin edi.
Bundan tashqari, hech qanday sezilarli inflyatsiya bo‘lmasdi - buning o‘rniga biz ilgari hech qachon ko‘rmagan Rekord darajadagi mamlakatni vayron qiluvchi inflyatsiyani boshdan kechirdik. Shuningdek, bizda o‘tib bo‘lmaydigan chegara bo‘lardi, u orqali juda kam noqonuniy shaxslar kirgan bo‘lardi”, degan Donald Tramp.
11-mart kuni Jidda shahrida (Saudiya Arabistoni) AQSH va Ukraina delegatsiyalari o‘rtasida muzokaralar bo‘lib o‘tdi. Muzokaralar yakunida tomonlarning qo‘shma bayonoti e’lon qilindi. Unga ko‘ra, Ukraina AQSHning 30 kunlik o‘t ochishni to‘xtatish taklifini qabul qilishga tayyor, Vashington esa darhol razvedka ma’lumotlarini taqdim etishdagi to‘xtamni bekor qiladi va Kiyevga harbiy yordam ko‘rsatishni qayta boshlaydi.
Rossiya Federatsiyasi prezidenti Vladimir Putin 13-mart kuni jurnalistlarning savollariga javob berar ekan, Trampga tinchlik kelishuvida ishtirok etgani uchun minnatdorchilik bildirdi va o‘t ochishni to‘xtatish g‘oyasini qo‘llab-quvvatladi. Biroq Rossiya rahbari bir nechta muhim savollarni ko‘tardi - Kursk viloyatiga bostirib kirgan ukrainalik harbiylarning maqomi, sulhni nazorat qilish va bu davrda Kiyevning harakatlari haqida.
Putin Moskva Ukrainadagi jangovar harakatlarni to‘xtatish takliflariga rozi ekanligini, ammo bular uzoq muddatli tinchlikka olib kelishi va inqirozning asl sabablarini bartaraf etishi kerakligini ta’kidladi.
Izoh (0)