Rossiya prezidenti Vladimir Putin Moskva tomoni Ukraina mojarosini hal qilish bo‘yicha muzokaralar stoliga qaytishga tayyorligini aytdi.
Uning so‘zlariga ko‘ra, Ukraina Ar-Riyodda Rossiya va AQSH delegatsiyalari uchrashuvida ishtirok etmagani uchun “vahimaga tushishga” asos yo‘q, chunki Kiyevni hech kim muzokaralar jarayonidan chetlatmayapti.
Rossiya hech qachon Ukraina bilan muzokaralar jarayonidan bosh tortmagan. Aksincha, hamkorlarimiz muzokaralarni rad etdi, yevropaliklar Rossiya bilan aloqani to‘xtatdi, Ukraina tomoni esa o‘ziga muzokaralar olib borishni taqiqladi, Istanbuldagi muzokaralar jarayonidan chiqdi va buni ochiqchasiga e’lon qildi, dedi Putin jurnalistlarga.
Rossiya yetakchisining aniqlik kiritishicha, Donald Tramp telefon orqali muloqot chog‘ida muzokaralar jarayoni Rossiya va Ukraina ishtirokida o‘tishini ta’kidlagan.
Putinga ko‘ra, u Donald Trampga Rossiya–Ukraina mojarosini qisqa vaqt ichida hal qilishning iloji yo‘qligi haqida aytgan, Amerika prezidenti esa bu borada ko‘proq ma’lumot olgach, “o‘z pozitsiyasini o‘zgartirgan”.
Ha, olti oy kerakligini aytdim. Hozir muddatlar haqida gapirmaymiz. Lekin bu tabiiy, bu yerda aytarli hech narsa yo‘q, deb tushuntirdi Putin.
Joriy yilning 18-fevral kuni Ar-Riyodda bo‘lib o‘tgan AQSH va Rossiya delegatsiyalarining muzokaralarida Ukrainadagi mojaroni hal qilish uchun muzokara guruhlarini tuzishga qaror qilindi.
Zelenskiy o‘sha kunning o‘zida 19-fevral kuniga rejalashtirilgan Saudiya Arabistoniga tashrifi kechiktirilganini e’lon qildi.
U bugungi Rossiya va AQSH rasmiy vakillari o‘rtasidagi uchrashuvdan so‘ng “tasodiflar” bo‘lishini istamasligini ta’kidladi.
U yerda kim qoladi, kim ketadi, kim qayerga borishini bilmayman. Ochig‘ini aytsam, menga farqi yo‘q. Lekin hamkorlarimiz biz haqimizda ortiqcha fikr yuritishlarini istamayman. Men tasodiflarni xohlamayman, shuning uchun ertaga Saudiya Arabistoniga bormayman, dedi Zelenskiy Turkiya prezidenti Rajab Toyyib Erdog‘on bilan uchrashuvdan so‘ng Anqarada o‘tkazilgan matbuot anjumanida.
Ukraina yetakchisi, shuningdek, AQSH va Rossiya delegatsiyalarining o‘tgan uchrashuviga izoh berib, Ukraina Rossiyaning ultimatumlarini qabul qilmasligini yana bir bor qayd etdi. U urush boshida Rossiya Ukrainaga shart qo‘yganini, xususan, Ukraina armiyasi sonini kamaytirish, hududiy yon berishlar, shuningdek, mamlakat rahbariyatiga Rossiya tarafdori bo‘lgan rahbariyatni qo‘yishni talab qilganini aytdi.
Izoh (0)