HAMAS Donald Trampning maxsus vakili Stiv Uitkoff tomonidan taqdim etilgan “ko‘prik” rejasini ko‘rib chiqmoqda. Al Arabiya xabariga ko‘ra, u Isroil bilan sulhni aprel oyi — ramazon va pasxa bayramlaridan keyingacha uzaytirishni ko‘zda tutadi. Bu davr davomida urushni butunlay to‘xtatish bo‘yicha muzokaralar olib borish rejalashtirilgan.
Shu bilan bir vaqtda, yahudiy davlati G‘azoga quruqlik, dengiz va havodan zarbalarini davom ettirmoqda. Birgina 18-mart kunining o‘zida 400 nafar falastinlik halok bo‘lgani xabar qilindi. Isroil mudofaa vazirining aytishicha, harbiylar hujumlarni yanada kuchaytirib, aholini anklavning janubiy qismiga “evakuatsiya qiladi”. U, shuningdek, jangovar harakatlar “HAMAS asirlarni to‘liq ozod qilmaguncha” va “butunlay mag‘lubiyatga uchramaguncha” to‘xtatilmasligini ta’kidlagan.
Birinchi Sinvar G‘azoni vayron qildi, ikkinchi Sinvar (uning vorisi — tah.) esa uni butunlay yo‘q qiladi. Tez orada tinch aholini janglar bo'ladigan hududlardan evakuatsiya qilish qayta boshlanadi, undan keyin esa yanada og‘irroq oqibatlar bo‘ladi — sizlar javobgarlikni to‘liq o‘z zimmangizga olasiz. Garovdagilarni qaytaring va HAMASdan xalos bo‘ling, aks holda, sizni butunlay yo‘q bo‘lish va halokat kutmoqda, degan vazir Isroil Kats g‘azoliklarga murojaat qilib.
Bu orada Misr ham sulh borasida o‘z taklifini ilgari surdi. Rejaga binoan Isroil qo‘shinlarining G‘azodan to‘liq chiqib ketishi uchun aniq muddat belgilangan bo‘lib, AQSH jarayonga kafillik qilishi kerak.
Gumanitar inqiroz chuqurlashmoqda
Isroil avvaliga G‘azo aholisi uchun gumanitar yordam kirishini to‘xtatib, so‘ng hujumlarni qayta boshladi. Bu esa anklav hududida gumanitar vaziyatni og‘irlashtirmoqda. BMTning falastinlik qochqinlarga yordam berish agentligi vakiliga ko‘ra, tashkilotda bor-yo‘g‘i olti kunlik un zaxirasi qolgan.
Bu urush boshidan beri G‘azoga hech qanday yordam yetkazib berilmagan eng uzoq muddat, deydi UNRWA vakili Sem Rouz.
Isroil va HAMAS o‘rtasidagi urush 2023-yil 7-oktyabrdan buyon davom etmoqda. Shundan buyon 1200 nafar isroillik hamda 50 mingga yaqin falastinlik halok bo‘ldi. Tomonlar kelishgan sulh bitimining 42 kunlik dastlabki bosqichi shu oy boshida yakunlandi. Biroq Isroil va HAMAS keyingi bosqich bo‘yicha kelishuvga erisha olmagach, yahudiy davlati anklavga to‘liq blokada joriy qildi. Shuningdek keng miqyosli harbiy harakatlarni qayta boshladi.
Izoh (0)