AQSH prezidenti Donald Tramp mamlakat Adliya vazirligiga sudlarda uning ma’muriyati siyosatiga qarshi ish olib borayotgan yuridik firmalar va advokatlarga bosim o‘tkazishni buyurgan. Bu haqda The Wall Street Journal gazetasi ma’lum qilmoqda.
Gazeta ma’lumotlariga ko‘ra, Tramp AQSH adliya vaziri va bosh prokurori Pem Bondiga “asossiz va shov-shuvli sud jarayonlarini olib borayotgan” huquqshunoslarga nisbatan sud orqali cheklovlar o‘rnatishga erishish vazifasini yuklagan.
Nashrning ta’kidlashicha, Adliya vazirligi allaqachon hukumat cheklovlariga duchor bo‘lishi mumkin bo‘lgan o‘ndan ortiq firmalar ro‘yxatini tuzgan. Bunday firmalarning mijozlari ilgari tuzilgan davlat shartnomalaridan mahrum bo‘lishi mumkin.
Bloomberg agentligining hisob-kitoblariga ko‘ra, Tramp ma’muriyati o‘z faoliyatining dastlabki ikki oyida uning qarorlariga qarshi 150 dan ortiq da’volarga duch kelgan. Sudda nizolashayotgan Amerika hukumati faoliyatining asosiy yo‘nalishlari orasida noqonuniy migratsiyaga qarshi kurash, xilma-xillik, tenglik va inklyuzivlik dasturlari (Diversity, Equality and Inclusion, DEI), shuningdek, AQSH hukumati faoliyati samaradorligini oshirish bo‘yicha idora ishi (DOGE) hamda davlat xizmatchilarini ommaviy ravishda qisqartirish masalalari bor.
Izoh (0)