O‘zbekiston bir yil davomida Fransiyaga uran yetkazib berish uchun Qozog‘iston kompaniyasi bilan shartnoma imzoladi.
Qozog‘iston kompaniyasi 500 konteyner uran konsentratini Sankt-Peterburg orqali Fransiyaga yetkazib beradi. O‘zbekistonning “Navoiyuran” davlat korxonasi bu uchun Qozog‘istonning TOO Logistic Centre kompaniyasiga 9 million yevro to‘laydi. Uran Fransiya janubidagi Malvezi kommunasiga yetkazib beriladi.
Tarif bo‘sh konteynerlarni Fransiyaning Marsel shahriga qaytarish narxini o‘z ichiga oladi. Tashish Sankt-Peterburg portidan yuk jo‘natilgan kundan boshlab 15 kun mobaynida amalga oshirilishi lozim
Shartnoma uchun dastlabki narx 11 million yevroni tashkil etgan. Keyinchalik mazkur summa kamaytirilgan. Uran 2026-yilning birinchi choragi oxirigacha tashiladi. “Navoiyuran” hozirda “Konverdin Enterprayz” (AQSH) va “Kameko Korporeyshn” (Kanada) qayta ishlash korxonalariga uran tashish bo‘yicha pudratchi qidirmoqda.
11-13-mart kunlari O‘zbekiston prezidenti Shavkat Mirziyoyevning Fransiyaga davlat tashrifi bo‘lib o‘tdi. Tashrif doirasida O‘zbekiston bilan Fransiya o‘rtasida Strategik hamkorlik o‘rnatish to‘g‘risidagi qo‘shma deklaratsiya, shuningdek, moliya-iqtisodiyot, investitsiya, ta’lim, madaniy-gumanitar va boshqa sohalarga doir qator hujjatlar imzolandi.
O‘zbekiston va Fransiya kompaniyalari o‘rtasida 6,5 milliard yevrolik qo‘shma loyihalarini amalga oshirishni nazarda tutuvchi Investitsiya va innovatsiya sohalaridagi hamkorlik dasturi qabul qilindi. Prezidentning tashrifi doirasida Parij shahrida ikki mamlakatning tegishli vazirlik va idoralari hamda 100 ga yaqin yetakchi kompaniyalari rahbarlari ishtirokida davra suhbati bo‘lib o‘tgan edi.
Izoh (0)