AQSH prezidenti Donald Trampning maxsus vakili Stiv Uitkoff Tacker Karlsonga intervyu berdi. Suhbat davomida u Ukrainadagi urush masalasiga ham to‘xtalib, sulhga to‘sqinlik qilaytgan eng katta omilni aytib o‘tdi. Siyosatchiga ko‘ra, Rossiya tomonidan bosib olingan Qrim va to‘rt mintaqa "asosiy muammo" bo‘lib turibdi.
Menimcha, bu mojarodagi eng katta muammo to‘rtta mintaqa: Qrim, Donbass, Lugansk va yana ikkita hudud (ehtimol, Xerson va Zaporojye viloyatlari nazarda tutilmoqda — tahr.). Ular rus tilida so‘zlashuvchi hududlar bo‘lib, u yerda referendumlar (xalqaro hamjamiyat ularni tan olmagan — tahr.) bo‘lib o‘tgan. Fikrimcha, bu asosiy masala, dedi Uitkoff.
Maslahatchining da'vo qilishicha, bosib olingan hududlarda o‘tkazilgan referendumlar go‘yoki aksariyat aholi Rossiya tarkibiga kirishini istashini ko‘rsatgan.
Stiv Uitkoff Ukraina ba'zi hududlaridan voz kechishi borasida hech kim gapirishni istamaganini aytib, buni "xonadagi fil" ga qiyosladi. Ya’ni ochiq-oydin ko‘rinib turgan, ammo hech kim tilga olishni istamaydigan muammo deb atadi.
Xonadagi fil – bu Ukrainadagi konstitutsiyaviy masalalar. Ya’ni ular ba'zi hududlaridan voz kecha oladimi? Rossiya usiz ham bu mintaqalarni de-fakto nazorat qilmoqda. Savol shuki, dunyo ularni Moskva tasarrufida deb tan oladimi? Agar Ukraina prezidenti Zelenskiy bunga ko‘nsa, siyosiy jihatdan omon qolishi mumkinmi? Mojarodagi markaziy masala shudir, deya qo‘shimcha qildi Uitkoff.
Biroq bu Uitkoffning Ukraina urushiga oid bahsli bayonotlarining birinchisi emas. Tramp maslahatchisi avvalroq G‘arb davlatlari yetakchilarining Rossiya urushni to‘xtatishni istamayotgani haqidagi bayonotlariga qo‘shilmagan edi. Uitkoffga ko‘ra, yaqin kelajakda tinchlik kelishuvi imzolanishi uchun "yaxshi tendensiyalar" mavjud.
Bundan tashqari, u Rossiya butun Ukrainani bosib olishga intilmayotganini ta’kidlab, hozirgacha bosib olingan viloyatlar va Qrim Moskva uchun yetarli ekanini iddao qilgan.
Izoh (0)