Crocus City Hall’dagi terakt ishi bo‘yicha 2300 dan ortiq kishi jabrlanuvchi deb topildi. Bu haqda Sankt-Peterburg xalqaro huquqshunoslik forumida (PXHF) Rossiya Tergov qo‘mitasi raisi Aleksandr Bastrikin ma’lum qildi.
“Jinoyat ishi 500 jilddan iborat. Juda katta tergov ishlari amalga oshirildi. 300 ta ko‘zdan kechirish, 2,5 mingta sud ekspertizasi o‘tkazildi. Yaqin orada ish sudga yo‘llanadi”, dedi Bastrikin.
Tergov qo‘mitasi taqdimotida aytilishicha, jinoyat ishi bo‘yicha yetkazilgan zarar 6 milliard rublni (taxminan 75 million AQSH dollari) tashkil etadi.
19-may kuni sud terakt ishi bo‘yicha gumonlanuvchilarga nisbatan ehtiyot chorasini uch oy-u 28 kunga uzaytirgani ma’lum bo‘ldi. Qaror qo‘lga olingan to‘rt kishiga taalluqli: Shamsiddin Fariduniy, Saidakrami Rachabalizoda, Dalerjon Mirzoyev va Muhammadsobir Fayzov. Ularning barchasi Rossiya Federatsiyasi hududidagi terrorchilar va ekstremistlar reyestriga kiritilgan.
Moskva yaqinidagi Krasnogorsk shahrida joylashgan Crocus City Hall’dagi terakt 2024-yilning 22-mart kuni sodir bo‘lgan. Qurollangan hujumchilar binoda bo‘lgan odamlarga avtomatik qurollardan o‘t ochgan va tomosha zalini yoqib yuborgan. Fojia oqibatida 145 kishi halok bo‘ldi, 550 dan ortiq kishi jarohatlandi.
Teraktning to‘rt ijrochisi 23-mart kuni Bryansk viloyatida qo‘lga olingan. Rossiya prezidenti Vladimir Putin ularning yashirinishga urinib, Ukraina tomon yo‘l olganini ma’lum qilgan. To‘rtovi ham Tojikiston fuqarolari ekani aniqlangan.
Izoh (0)