Rossiya prezidenti Vladimir Putin uning mamlakati Ukrainaga nisbatan deyarli ikki baravar ko‘proq harbiy xizmatchilarni frontga yuborayotganini aytdi. Bu haqda “Kremlin.ru” xabar berdi.
Putinning ta’kidlashicha, Ukraina hukumati “majburiy safarbarlik”ni amalga oshirayotgan bir vaqtda, Rossiyada odamlar urushga “o‘z ixtiyori” bilan ketmoqda.
Ular zo‘rg‘a 30 ming kishini safarbar qilayotgan bo‘lsa, bizga oyiga 50-60 ming yigit o‘z ixtiyori bilan kelmoqda, dedi u.
Biroq bu bayonotlar G‘arb razvedka xizmatlarining hisob-kitoblariga mos kelmaydi. AQSH va Yevropa Ittifoqi razvedkasi Rossiya armiyasiga har oyda chaqirilayotgan harbiylar sonini 30–40 ming atrofida deb baholagan. Tahlilchilarga ko‘ra, armiyaga qo‘shilish uchun asosiy rag‘bat — katta miqdordagi pul mukofotlari bo‘lib qolmoqda. Bundan tashqari, qamoqxonalardan mahbuslarni safarbar etish ishlari ham davom etmoqda.
Biroq bu choralar faqat frontdagi katta yo‘qotishlarni qoplash uchun yetarli, xolos, deyiladi xabarda.
Britaniya razvedkasi urush boshlanganidan beri Rossiya armiyasi orasida halok bo‘lgan va yaralanganlar sonini qariyb bir million kishiga baholagan. Shunga qaramay, Rossiya muhim hududiy yutuqlarga erisha olmagan. 2024-yil yakunida Rossiya qo‘shinlarining oldinga siljishi Ukraina hududining atigi 0,5 foizini tashkil qilgan.
Rossiya yollashning hozirgi sur’atini uzoq vaqt saqlab qola olmaydi. Moskva jangovar harakatlarni hozirgi darajada davom ettirishi uchun taxminan 12–16 oy vaqti bor, deydi Amerikaning Urushni o‘rganish instituti (ISW)dagi Rossiya bo‘yicha tahliliy guruh rahbari Jorj Barros.
U Rossiyani iqtisodiy muammolar, resurslar tanqisligi va inson salohiyatining cheklangani to‘xtatib turganini aytgan.
The Economist nashriga ko‘ra, yo‘qotishlarning ortib borishi va inson resurslarining cheklangani fonida Rossiya Bosh shtabi hamda Mudofaa vazirligi safarbarlikning yangi to‘lqinini boshlash uchun Kremlga bosim o‘tkazmoqda. Harbiylar bu jarayonni 2024-yil may oyida boshlashni taklif qilgan.
Putin 2022-yil sentyabrida “qisman safarbarlik” e’lon qilgan edi. Shundan so‘ng turli manbalarga ko‘ra, 650 mingdan 1,1 milliongacha rossiyalik mamlakatni tark etgan. The Bell nashrining 70 ta davlat migratsiya xizmatlari ma’lumotlariga tayangan hisobotiga ko‘ra, 2024-yil iyul holatiga kelib ularning kamida 666 ming nafari Rossiyaga qaytmagan.
Izoh (0)