Rossiya Federal xavfsizlik xizmati 3-may kuni mamlakat hududida teraktlar uyushtirishni rejalashtirgan ukrainalik diversantni yo‘q qilgan. Bu haqda The Moscow Times nashri xabar berdi.
Manbada aytilishicha, terrorchilikda gumonlangan erkak Moskva atroflarida kamida 3 ta teraktni amalga oshirishni rejalashtirgan. Xavfsizlik xizmatlari bundan xabar topib, butun mamlakatda unga nisbatan qidiruv eʼlon qilgan.
Rossiya Federal xavfsizlik xizmati xabariga ko‘ra, erkak Rossiya harbiy va energetika obyektlariga hujum qilishni rejalashtirgan.
“Diversant Ukraina Mudofaa vazirligining buyrug‘i bilan Rossiya hududida, jumladan, Rossiya Mudofaa vazirligi obyektlarida teraktlar uyushtirishni reja qilgan. Ko‘ngillilar batalyoni va uning Sankt-Peterburgdagi markazi xodimlariga qarshi bir qator terrorchilik harakatlarini amalga oshirishga harakat qilgan”, — deyiladi rasmiy xabarda.
Gumon qilinayotgan agent Litva sharqidagi Pabrade shahrida qurol va portlovchi moddalar bo‘yicha tayyorgarlikdan o‘tgach, mart oyida Rossiya hududiga kirib kelgani aytilgan. Federal xavfsizlik xizmati xodimlari uni dastlab Moskva viloyatida hibsga olishga harakat qilishgan, biroq u qochishga muvaffaq bo‘lgan. Keyinchalik erkak Leningrad viloyatida aniqlanib, yashirin saqlash joyidan qurol olishga urinayotganda o‘ldirilgan.
Maxsus xizmatlar o‘ldirilgan agentning shaxsini oshkor qilmagan. Hodisa yuzasidan qo‘shimcha surishtiruv olib borilayotgani xabar qilingan.
Izoh (0)