Rossiya FVV Krasnogorskdagi Crocus City Hall konsert zalida sodir etilgan terakt qurbonlari soni 143 kishiga yetganini ma’lum qildi. Bu haqda Deutsche Welle xabar berdi.
27-mart kuni Rossiya sog‘liqni saqlash vaziri Mixail Murashko 80 nafar jabrlanuvchi, jumladan, olti nafar bola davolanayotganini ma’lum qilgan edi. To‘rt nafar bemorning ahvoli o‘ta og‘ir, yana 19 nafari, jumladan, uch nafar bolaning ahvoli og‘ir. 34 nafar jabrlanuvchining ahvoli o‘rtacha og‘irligicha qolmoqda, 23 nafariga tez orada kasalxonadan chiqishga ruxsat beriladi.
27-mart kuni FVV xodimlari yonib ketgan markaz o‘rnida vayronalarni tozalash ishlarini yakunlagan, yangi jasadlar endi qidirilmaydi.
Аvvalroq Baza manbasi qurbonlar soni 144 nafarga yetganini maʼlum qilgan edi, u, shuningdek, 95 nafar kishi bedarak yo‘qolgani haqida xabar qilgan. Mazkur shaxslar teraktdan keyin qarindoshlari bilan aloqaga chiqmagan, ammo qurbonlar va halok bo‘lganlar ro‘yxatida ham mavjud emas.
Crocus City Hallda terrorchilik hujumi
Moskva yaqinidagi Krasnogorskdagi Crocus City Hall konsert zalida terakt 22-mart kuni kechqurun sodir bo‘lgan, o‘shanda bir guruh kishi konsert tomoshabinlariga qarata o‘t ochib, yong‘in chiqargan.
Rossiya Federal xavfsizlik xizmati direktori Aleksandr Bortnikovning aytishicha, Krokusdagi teraktdan so‘ng 11 kishi, jumladan, jinoyatning to‘g‘ridan-to‘g‘ri ishtirokchisi bo‘lgan 4 kishi qo‘lga olingan. Putin boshchiligida Rossiya rasmiylari Ukrainani mazkur teraktga aloqadorlikda ayblagan.
Ukraina voqeaga aloqadorligini rad etgan. G‘arb davlatlari, jumladan AQSH, Buyuk Britaniya va Germaniya boshidanoq Ukrainaning Crocus teraktiga hech qanday aloqasi yo‘qligini ta’kidlagan.
Moskva viloyatidagi Crocus City Hall konsert zalida uyushtirilgan ommaviy qirg‘in uchun javobgarlikni “ISHID – Viloyat Xuroson” terrorchilik guruhi o‘z zimmasiga olgani haqida aytilmoqda. AQSH Davlat departamenti mamlakat razvedka xizmatlariga tayanib, bu iqrorni haqiqiy deb hisoblagan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)