Bugun, 14-avgust kuni prezident Shavkat Mirziyoyev O‘zbekistondagi diplomatik missiyasini yakunlayotgan Fransiyaning favqulodda va muxtor elchisi Oreliya Bushezni qabul qildi.
Prezident matbuot xizmati xabariga ko‘ra, O‘zbekiston prezidenti Fransiya elchisining samarali faoliyati hamda mamlakatlar o‘rtasidagi strategik sheriklik munosabatlarini rivojlantirish va mustahkamlashga qo‘shgan shaxsiy hissasini alohida qayd etgan.
Bo‘lib o‘tgan oliy darajadagi o‘zaro tashriflar O‘zbekiston—Fransiya hamkorligini sifat jihatidan yangi bosqichga ko‘tarish, uning kun tartibini aniq mazmun bilan boyitishga xizmat qilgani taʼkidlangan.
“Turli darajalarda tizimli muloqot va faol aloqalar yo‘lga qo‘yilgan. Savdo-iqtisodiy sohada sezilarli muvaffaqiyatlarga erishildi: keyingi yillarda tovar ayirboshlash to‘rt barobar ko‘paydi, Fransiyaning yetakchi kompaniya va tashkilotlari bilan umumiy qiymati 10 milliard dollardan ziyod loyihalar amalga oshirilmoqda. Taʼlim, sog‘liqni saqlash va madaniy-gumanitar almashinuv sohalarida muhim dasturlar amalga oshirilmoqda. Luvr muzeyi va Arab dunyosi institutida ko‘rgazmalar katta muvaffaqiyat bilan o‘tdi”, deyiladi manbada.
Matbuot xizmati Parij shahri yaqinida Beruniy haykali ochilgani, Fransiya poytaxtidagi ko‘chaga Samarqand nomi berilganini qayd etgan. Joriy yilda Toshkent shahrida O‘zbekiston—Fransiya universiteti o‘z ishini boshlaganini urg‘ulagan.
Uchrashuv yakunida Shavkat Mirziyoyev Oreliya Bushezga O‘zbekiston va Fransiya o‘rtasida do‘stlik va strategik sheriklik munosabatlarini mustahkamlashga qo‘shgan katta hissasi uchun “Do‘stlik” ordenini topshirgan. Bu bo‘yicha prezident farmoni qabul qilindi.
Elchi o‘z diplomatik missiyasi yuksak baholangani hamda ikki mamlakat o‘rtasidagi hamkorlikni rivojlantirishni har tomonlama qo‘llab-quvvatlayotgani uchun O‘zbekiston prezidentiga minnatdorlik bildirgan.
Izoh (0)