Avvalroq Moskva viloyatida general Igor Kirillov va uning yordamchisi Ilya Polikarpovni o‘ldirganlikda gumonlanib, O‘zbekiston fuqarosi qo‘lga olingani haqida xabar berilgandi. O‘zbekistonning Rossiyadagi elchixonasi holat bo‘yicha izoh berdi.
Elchixona 17-dekabr kuni sodir etilgan terakt ishi doirasida O‘zbekiston fuqarosi hibsga olingani haqidagi tarqalgan maʼlumotlarga eʼtibor qaratdi.
Diplomatik vakolatxona qabul qiluvchi davlat huquq-tartibot idoralari bilan aloqada bo‘lib, ushbu voqeani sodir etganlikda gumon qilingan shaxs haqidagi maʼlumotni aniqlashtirmoqda.
Igor Kirillov va uning yordamchisi Ilya Polikarpovning o‘limi
Rossiya FXXga ko‘ra, 17-dekabr kuni general va yordamchisining o‘limiga sabab bo‘lgan teraktni amalga oshirgan shaxs bombani elektr samokatga o‘rnatgan. O‘zbekiston fuqarosi kuzatuv uchun karshering mashinasini ijaraga olib, unga Wi-Fi kamerasini ulagan. Tasvirlar esa Dnepropetrovskdagi terakt tashkilotchilariga uzatilgani ma’lum qilingan.
Ta’kidlanishicha, general va yordamchisi podyezddan chiqishi haqida videosignal olingandan so‘ng, Ukraina razvedkasi masofadan turib bombani ishga tushirishga ko‘rsatma bergan.
“Qotillik sodir etgan O‘zbekiston fuqarosiga Ukraina maxsus xizmatlari tomonidan 100 ming AQSH dollari miqdorida mukofot puli va Yevropa ittifoqiga chiqish va’da qilingan”, deyiladi Rossiya FXX bayonotida.
Qotillikda gumonlangan o‘zbekistonlik erkak Moskva viloyati Balashixa tumanidagi Chernoye qishlog‘ida qo‘lga olingan.
Izoh (0)