Crocus City Hall’dagi terakt oqibatida oilasi jabrlangan yuz nafar bola Rossiyadan O‘zbekistonga ta’tilga keldi. Bu haqda “O‘zbekiston 24” axborot kanali xabar berdi.
Unga ko‘ra, O‘zbekiston tomoni bolalar uchun ikki haftalik tadbirlar dasturini tayyorlagan. Kelganlar Toshkent viloyati Bo‘stonliq tumanidagi “Anor” bolalar sog‘lomlashtirish oromgohida dam oladi, sport musobaqalarida, taniqli sportchilar bilan mahorat saboqlarida qatnashadi, rasm, raqs, teatr va musiqa to‘garaklarida tahsil oladi. Ularning ixtiyorida kompyuter laboratoriyasi va kutubxona ham bo‘ladi.
Crocus City Hall’dagi teraktdan jabr ko‘rgan oilalarning bolalarini bepul dam olishga olib borish va ularga Toshkentning diqqatga sazovor joylarini ko‘rsatish tashabbusi O‘zbekiston Kasaba uyushmalari federatsiyasi tomonidan ko‘tarilgani ma’lum qilindi. Tashkilot bolalarning parvoz va bayramni tashkil etish xarajatlarini qoplab bergan.
Maʼlumot o‘rnida, 22-mart kuni kechki payt Moskva viloyatining Krasnogorsk shahridagi Crocus City Hall majmuasida terakt sodir etildi. Rossiya Tergov qo‘mitasi maʼlumotlariga ko‘ra, hodisa oqibatida halok bo‘lganlar soni 145 nafarni tashkil etgan. 550 dan ortiq fuqaro yaralangan.
Izoh (0)