Rossiya AQSH bilan yana bir mahbuslar almashinuvini ko‘rib chiqishga, albatta, tayyor bo‘ladi, ayniqsa saylangan prezident Donald Trampning faoliyati boshidagi davrida, deya ma’lum qildi Rossiya tashqi ishlar vaziri o‘rinbosari Sergey Ryabkov.
Uning so‘zlariga ko‘ra, bunday bitimlar “ikki tomondan ko‘p bosqichli yondashuvni” talab qiladi. Shu bilan birga, Ryabkov yangi bitim “oldinga qo‘yilgan sog‘lom qadam” bo‘lishini va Rossiya hamda AQSH o‘rtasidagi munosabatlarni yaxshilashga yordam berishini ta’kidladi.
MASH ma’lumotlariga ko‘ra, mahbuslar almashinuvi 2025-yil fevral oyida, Trampning 20-yanvarga rejalashtirilgan inauguratsiyasidan bir necha hafta o‘tgach bo‘lib o‘tishi mumkin. Rossiya TIV ro‘yxatida AQSHda josuslik va sanksiyalarni chetlab o‘tish sxemalarini tashkil etishda ayblangan 70 kishi bor.
“Amerika ro‘yxatiga harbiy xizmatchi Gordon Blek, AQSH fuqarosi Jozef Teyter, shuningdek, AQSH va Rossiya fuqarosi Kseniya Karelina kiradi. Yevropa Ittifoqining iltimosiga ko‘ra, ro‘yxatga temir yo‘llarda terakt va qo‘poruvchilikda ayblangan rossiyaliklar qo‘shildi, ularning aksariyati bolalar va o‘smirlar”, deb ta’kidlaydi Mash.
Moskva va G‘arb o‘rtasidagi avvalgi mahbuslar almashinuvi joriy yilning 1-avgust kuni Anqarada bo‘lib o‘tgan edi. Rossiya Germaniya va AQSHga ularning fuqarolarini, shuningdek siyosiy moddalar bo‘yicha hukm qilingan rossiyalik mahbuslarni topshirgan. Xususan, siyosatchi Vladimir Kara-Murza va sobiq Moskva munitsipal deputati Ilya Yashin ham ular orasida bo‘lgan.
Izoh (0)