Ukraina prezidenti Vladimir Zelenskiy urushni tugatish uchun Rossiya “noreal” shartlar qo‘yayotganini aytdi. Siyosatchi bu haqda AQSH vitse-prezidenti Jyey Di Vens va davlat kotibi Marko Rubio bilan Rimda bo‘lgan uchrashuvda ma’lum qildi.
Tomonlar 18-may kuni Turkiyada bo‘lib o‘tgan muzokaralarni muhokama qilgan. Zelenskiy Kiyev “haqiqiy diplomatiya”ga tayyorligini tasdiqlagan. U “imkon qadar tezroq to‘liq va so‘zsiz o‘t ochishni to‘xtatishga” chaqirgan
Uchrashuvda Rossiyaga qarshi sanksiyalar zarurati, ikki tomonlama savdo, mudofaa hamkorligi, jang maydonidagi vaziyat va kelajakdagi asirlar almashinuvi masalasiga ham to‘xtalib o‘tildi, degan Ukraina prezidenti.
U Moskvaga “urushni to‘xtatishga tayyor bo‘lmaguncha” bosim o‘tkazishni davom ettirish zarurligini aytgan.
Albatta, biz adolatli va barqaror tinchlikka erishish yo‘lida birgalikdagi harakatlarimizni muhokama qildik. Hayotlarni saqlab qolishdagi yordami va yetakchiligi uchun butun Amerika xalqiga minnatdorlik bildiraman, dedi Zelenskiy.
Prezident matbuot xizmati tushuntirishicha, Zelenskiy AQSH vakillarini Istanbuldagi muzokaralar va “Rossiya uzoq muddatli o‘t ochishni to‘xtatish uchun qo‘ygan noreal shartlar” haqida xabardor qilgan.
Muzokaralarda qatnashgan Rossiya delegatsiyasining darajasi pastligi ular hech qanday qaror qabul qilish vakolatiga ega emasligini ko‘rsatgan, degan siyosatchi.
Ta’kidlanishicha, suhbatdoshlar Ukraina va AQSH o‘rtasidagi iqtisodiy sheriklik to‘g‘risidagi kelishuvni amalga oshirishga e’tibor qaratgan. Zelenskiy AQSH yetakchisi Donald Trampga “mudofaa-sanoat va savdo sohalarida hamkorlik bo‘yicha yangi takliflar bilan maktub” yuborganini aytgan.
Avvalroq Rossiyaning 16-may kuni Istanbulda bo‘lib o‘tgan muzokaralarda Ukrainaga qo‘ygan talablari ma’lum bo‘lgandi. Ikki mamlakat delegatsiyalarining uchrashuvi ikki soatga ham bormadi. Turkiya tashqi ishlar vaziri Hoqon Fidan tomonlar muzokaralarni davom ettirish uchun yangi uchrashuvga kelishib olganini aytgan.
G‘arb nashri xabariga ko‘ra, Rossiyaning muzokaralardagi beshta sharti quyidagicha:
- Betaraf Ukraina: mamlakat hududida “Avstriya neytraliteti modeli” kabi hech qanday xorijiy qo‘shinlar yoki ommaviy qirg‘in qurollari bo‘lmasligi kerak.
- Reparatsiyalarsiz: ikkala tomon ham urush tufayli yetkazilgan zararni qoplash bo‘yicha har qanday da’volardan voz kechishi kerak.
- Rusiyzabonlar huquqlari: Ukraina ozchiliklar huquqlari bo‘yicha Yevropa standartlarini qabul qilishi va “millatchilik tashviqoti”ga chek qo‘yishi kerak.
- Hududlarni tan olish: Rossiya Ukrainaning beshta viloyati (Donetsk, Lugansk, Xerson, Zaporojye va Qrim) ga nisbatan “konstitutsiyaviy” da’volari rad etmasligini istaydi. Shuningdek, Kreml bosib olingan hududlarga bo‘lgan huquqlarini xalqaro miqyosda tan olishga intilmoqda.
- O‘t ochishni darhol to‘xtatish sharti: Ukraina mudofaa kuchlari Ukrainaning Rossiya da’vo qilayotgan barcha 5 ta hududidan chiqib ketishi kerak.
Izoh (0)