Tojikistonning Vahdat shahrida yashovchi to‘qqiz nafar fuqaro Crocus’dagi terakt ijrochilari bilan aloqasi borlikda ayblanib, qo‘lga olindi. Bu haqda Tojikiston maxsus xizmatlaridagi manbaga tayanib, “RIA Novosti” xabar berdi.
“Vahdatning 9 nafar fuqarosi 22-mart kuni Crocus City Hall’da terakt sodir etgan shaxslar bilan aloqada bo‘lgani uchun qo‘lga olindi”, — deydi manba.
Hibsga olinganlar ISHID bilan aloqada bo‘lganlikda ham gumon qilinmoqda. To‘qqiz nafar fuqaro Rossiya xavfsizlik kuchlari bilan hamkorlikda ushlangan. 26-mart kuni rossiyalik tergovchilar teraktda ayblanayotgan to‘rt kishining oila a’zolarini so‘roq qilish uchun Tojikistonga yetib kelgandi. So‘roq davomida tojikistonlik ayblanuvchi Faridun Shamsiddinning uyi muhrlangani ma’lum bo‘lgan.
Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 137 kishi halok bo‘lgan, 182 kishi jarohatlangan. Hujumni sodir etishda Tojikistonning to‘rt nafar fuqarosi ayblangan, ular aybiga iqror bo‘lgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
Izoh (0)