Rossiya qo‘shinlari Finlyandiya bilan chegara yaqinidagi bazalarni mustahkamlamoqda va harbiy infratuzilma qurmoqda. Bu haqda sun‘iy yo‘ldosh tasvirlariga tayanib, The New York Times xabar berdi.
Finlyandiya bilan chegara yaqinida harbiy infratuzilma: chodirlar, qiruvchi samolyotlar uchun angarlar va harbiy texnika omborlari qurilmoqda. Ilgari deyarli tashlab qo‘yilgan vertolyot bazasida muntazam qurilish ishlari olib borilmoqda.
NATO davlatiga hujum qilish Ukrainadagi urush natijasiga bog‘liq bo‘ladi, deydi razvedka vakillari.
Bu harakatlar hozircha uzoq muddatli va keng qamrovli rejaga kirishishning boshlanishi bo‘lib ko‘rinmoqda. NATO rasmiylariga ko‘ra, bu holat 2022-yilda Rossiya Ukrainaga bostirib kirishidan oldin Ukraina chegarasi yaqinida olib borilgan harbiy to‘planishlarga o‘xshamaydi.
Hozircha Rossiyaning e’tibori Ukrainadagi urushga qaratilgan, shu bois chegarada uncha ko‘p harbiy kuch yo‘q. Finlyandiyaliklar ham hozircha bu holatni katta xavf sifatida ko‘rmayapti, deyiladi xabarda.
Yaqinda Finlyandiya chegarasidan 160 kilometrdan kamroq masofada Arktikadagi bazada Rossiya Qurolli kuchlarining o‘nlab samolyotlari aniqlangandi. Taxminan bir yil oldin Finlyandiyadan 65 kilometr uzoqlikdagi Kamenka shahrida yuzdan ortiq yangi chodirlar paydo bo‘lgan. Bundan tashqari, Estoniyadan taxminan 130 kilometr uzoqlikdagi bazada yangi chodirlar va harbiy texnikalar kuzatilgan.
Rossiyaliklar brigadalarni diviziyalargacha kengaytirmoqda. Chegaralarimiz yaqinidagi bo‘linmalar soni mingga oshadi, dedi finlyandiyalik tahlilchi Emil Kastelmi.
Ekspertning baholashicha, yaqin bir necha yil ichida Finlyandiya chegarasidagi vaziyatda jiddiy o‘zgarishlar yuz beradi. Bunda Ukrainadagi urushning tugashi natijasi va muddati katta ahamiyatga ega.
Izoh (0)