Ukraina har qanday samarali muzokara formatiga tayyor, biroq Rossiya voqelikka to‘g‘ri kelmaydigan shartlarni qo‘yishni to‘xtatishi lozim. Bu haqda Ukraina prezidenti Vladimir Zelenskiy o‘zining Telegram kanalida ma’lum qildi.
Zelenskiy finlyandiyalik hamkasbi Aleksandr Stubb bilan suhbatlashganini ma’lum qilgan. Uning aytishicha, muzokaralar davomida tomonlar bir-birlarini hamkorlar bilan aloqalar to‘g‘risida xabardor qilgan, shuningdek Oq uy rahbari Donald Tramp bilan kechagi suhbat tafsilotlarini muhokama qilingan.
Ta’kidlanishicha, Rossiya hozirda urushni davom ettirish uchun vaqt yutishga urinmoqda. Kiyev esa o‘z navbatida G‘arb bilan hamkorlikda rossiyaliklarni boshqacha xatti-harakatlarga majburlash ustida ishlamoqda.
“Urush aniq va real takliflar bo‘lishi lozim bo‘lgan muzokaralar stolida yakunlanishiga shubha yo‘q. Ukraina har qanday samarali muzokara formatiga tayyor. Agar Rossiya bundan buyon ham voqelikka to‘g‘ri kelmaydigan shartlarni ilgari sursa va erishilishi mumkin bo‘lgan natijalarga putur yetkazsa, qat’iy choralar ko‘rilishi lozim”, deya qo‘shimcha qildi u.
19-may kuni AQSH prezidenti Donald Tramp Rossiya prezidenti Vladimir Putin va Ukraina rahbari bilan telefon orqali muloqot qilgan. Shu bilan birga, u Zelenskiy bilan ikki marta gaplashgan: avval unga qo‘ng‘iroq qilgan, keyin Putin bilan suhbatlashgan, shundan so‘ng yana Ukraina prezidenti bilan bog‘langan.
Muzokaralar yakunida Oq uy rahbari Rossiya va Ukraina harbiy harakatlarni to‘xtatish va qurolli mojaroni yakunlash uchun muzokaralar stoliga o‘tirishi kerakligini ta’kidlagan.
Izoh (0)