Avstraliyaning Sidney shahrida pichoq bilan qurollangan erkak savdo markazida odamlarga hujum qildi. Bu haqda The Syndey Morning Herald xabar berdi.
Hodisa 13-aprel kuni Bondi Jankshen rayonidagi Westfield savdo markazida sodir bo‘lgan. Guvohlar erkak “katta pichoq” bilan qurollanganini aytgan. Hodisa oqibatida olti kishi halok bo‘lgan, sakkiz kishi, jumladan, bir bola kasalxonaga yotqizilgan.
Erkak politsiya tomonidan otib o‘ldirilgan. Uning mazkur harakatlari sababi hozircha noma’lum, huquq-tartibot idoralari uning terrorchilar bilan aloqasi bor-yo‘qligini tekshirmoqda. Hujumda ehtimol yana bir kishi ishtirok etgan bo‘lishi mumkin, ammo bu haqda rasmiy ma’lumotlar yo‘q.
Eslatib o‘tamiz, 22-mart kuni Moskva viloyati Crocus City Hall savdo markazida terakt sodir bo‘lgandi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocus’dagi terakt ijrochilari bilan aloqadorlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksilterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan ta’minlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hall’dagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)