Rossiya Federatsiyasi va Ukraina o‘rtasidagi inqirozni hal etish uchun qabul qilinadigan qarorlar yanada puxta o‘ylanishi lozim. Chunki vaziyatning natijasi butun qit’adagi dunyo tartibiga ta’sir ko‘rsatadi. Bu haqda Germaniyaning yangi kansleri Fridrix Merts yangi hukumatning parlamentdagi ilk bayonotida bildirdi.
Uning so‘zlariga ko‘ra, bu mojaroning natijasi Yevropa va kelajak dunyosida qonun-qoidalar o‘rnatilishi yoki “kuchlilar omon qoladigan zo‘ravon militarizm” hukmronlik qilishini belgilaydi.
“Hozir butun qit’adagi dunyo tartibi xavf ostida”, dedi u.
Merts o‘z hukumatining asosiy ustuvor vazifasi armiyani mustahkamlash, Yevropa uchun esa birlik ekanini ta’kidladi.
“Ukrainada butun qit’amizdagi dunyo tartibi xavf ostida. Ushbu tarixiy va hal qiluvchi vaziyatda Yevropa har qachongidan ham birdamroq bo‘lishi shart”, dedi u.
Bundan tashqari, kansler Germaniya ko‘plab iqtisodiy va ijtimoiy muammolarni o‘z kuchi bilan yengib o‘ta olishiga ishonch bildirib, buning uchun ko‘p jihatdan siyosatni o‘zgartirish zarurligi haqida gapirgan.
“Biz o‘z kuchimiz bilan yana dunyo hayrat bilan qaraydigan o‘sish lokomotiviga aylanishimiz mumkin”, deya qo‘shimcha qildi Merts.
Rossiya prezidenti Vladimir Putin 11-may kungi murojaatida Ukraina bilan 2022-yil bahorida Istanbuldagi raunddan so‘ng to‘xtab qolgan to‘g‘ridan-to‘g‘ri muzokaralarni qayta boshlashni taklif etdi. O‘shanda, Rossiya rahbarining aytishicha, Kiyev delegatsiyasi maslahatlashuvlarda ishtirok etishni to‘xtatgan, dastlabki kelishilgan bitim loyihasi esa, Moskva ta’kidlaganidek, G‘arb hamkorlarining bosimi ostida rad etilgan.
Rossiya taklifiga javoban Ukraina prezidenti Vladimir Zelenskiy o‘zining Telegram-kanalida, agar o‘t ochish to‘xtatilsa, 15-may kuni shaxsan Putinni Istanbulda kutishini yozdi. Uning so‘zlariga ko‘ra, harbiy harakatlarning “to‘liq va uzoq muddatli” to‘xtatilishi diplomatiya uchun zarur asos bo‘ladi.
Izoh (0)