AQSH maxsus xizmatlari Moskvadagi Crocus City Hall konsert zaliga uyushtirilgan qurolli hujumga o‘xshash xorijiy terrorchilik hujumidan xavotirda. Bu haqda Federal qidiruv byurosi direktori Kristofer Rey ma’lum qildi.
Amaldor tegishli bayonotini Kongress vakillar palatasining sud qo‘mitasida bo‘lib o‘tgan eshituvda e’lon qilgan.
“Biz xorijdan tayyorlanayotgan terroristik hujum tahdidi va umuman olganda, Rossiyadagi konsert zalida ko‘rganimizga o‘xshash muvofiqlashtirilgan terrorchilik hujumi ehtimolidan tobora ko‘proq xavotirdamiz. Lekin bu safar AQSHda (kuzatilishi mumkin). 2001-yil 11-sentyabrdagi teraktlardan farqli o‘laroq, biz xorijiy terrorchilik tahdidida yumshoq maqsadlarga urg‘u berilayotganini ko‘rib turibmiz”, dedi byuro direktori.
Shuningdek, Kristofer Rey terrorchilarning e’tiborini “oddiy odamlar hayot kechiradigan” joylar jalb qilishini aytib, AQSHga xorijdan terrorchilar kirib kelganiga ishonmasligini bildirdi.
Hozirda maxsus xizmat ISHID, “Al-Qoida” va mamlakatda faoliyati taqiqlangan boshqa guruhlar faoliyati yuzasidan surishtiruv olib bormoqda.
Maʼlumot o‘rnida, 22-mart kuni tunda Moskva viloyatining Krasnogorsk shahridagi Crocus City Hall majmuasida terakt sodir etildi. Rossiya Tergov qo‘mitasi maʼlumotlariga ko‘ra, hodisa oqibatida halok bo‘lganlar soni 145 nafarni tashkil etgan. 550 dan ortiq fuqaro yaralangan. Terakt bo‘yicha tergov doirasida hibsga olinganlar 20 nafarni tashkil qilmoqda.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)