AQSH prezidenti Donald Tramp Rossiya rahbari Vladimir Putinga Ukraina urushini tugatish uchun iqtisodiy rag‘batlar taklif qilishni ko‘zlamoqda. The Telegraph nashrining yozishicha, bu takliflar Rossiyaga noyob yer elementlari va qimmatbaho tabiiy resurslarga ega bo‘lish imkonini beradi.
Ma’lum qilinishicha, Tramp 15-avgust, juma kuni Alyaskada bo‘lib o‘tadigan uchrashuvga Putinga mo‘ljallangan bir qator “pulli imkoniyatlar” bilan keladi. Ularga Alyaskaning tabiiy boyliklaridan foydalanish, Rossiya aviatsiya sanoatiga qo‘yilgan ba’zi AQSH sanksiyalarini bekor qilish ham kiradi.
Asosiy takliflardan biri — Rossiya egallab turgan Ukraina hududidagi noyob yer boyliklarini Putinga berish. Ukraina dunyo litiy zaxiralarining qariyb 10 foiziga ega bo‘lib, uning yirik konlari aynan Rossiya qo‘l ostidagi hududlarda joylashgan.
Ma’lum bo‘lishicha, AQSH moliya vaziri Skot Bessent prezidentga uchrashuv oldidan iqtisodiy takliflarni tayyorlashda yordam bermoqda. Vashington, bu yo‘l bilan, o‘t ochishni to‘xtatish kelishuvini tezlashtirishga umid qilmoqda.
Tramp uchrashuvdan so‘ng Ukraina prezidenti Vladimir Zelenskiy ham ishtirok etadigan ikkinchi uchrashuvni darhol tashkil qilishni rejalashtirayotganini aytgan. Zelenskiy esa AQSH rahbari Ukraina uchun xavfsizlik kafolatlarini qo‘llab-quvvatlaganini bildirgan.
Shuningdek, rejalarga Rossiya samolyotlari uchun ehtiyot qismlar eksportiga qo‘yilgan taqiqlarni yumshatish, hamda Alyaskaning Bering bo‘g‘oziga yaqin hududidagi katta neft va gaz zaxiralaridan Rossiyaning foydalanishiga imkon berish ham kiritilgan.
Biroq Yevropa yetakchilari bu rag‘batlar “Putinga mukofot” sifatida ko‘rinmasligi kerakligini ta’kidlamoqda. AQSH rasmiylari esa uchrashuvni “tinglash va imkoniyatlarni baholash” bosqichi sifatida ko‘rmoqda.
Izoh (0)